nok-e-neza pe rakhte haiñ sar bhī
aur hāthoñ meñ apne ḳhanjar bhī
kyā ḳhabar koī kaise pesh aa.e
phuul bhī rakhiye aur patthar bhī
din bhī phirte haiñ le ke qismat ko
lauT aate haiñ shaam ko ghar bhī
chhat pe dilbar ke jo utarte the
uḌ ga.e ab vo sab kabūtar bhī
apne ham-sāya kī ḳhushī ke liye
kar diyā us ne muntaqil ghar bhī
jo tamanna hai puurī kar liije
pesh hai sar bhī aur patthar bhī
jis ke band-e-naqāb khulte na the
kyā huī us ke sar kī chādar bhī
jab paroñ ko havā katartī hai
saath dete nahīñ haiñ shahpar bhī
nok-e-neza pe rakhte hain sar bhi
aur hathon mein apne KHanjar bhi
kya KHabar koi kaise pesh aae
phul bhi rakhiye aur patthar bhi
din bhi phirte hain le ke qismat ko
lauT aate hain sham ko ghar bhi
chhat pe dilbar ke jo utarte the
uD gae ab wo sab kabutar bhi
apne ham-saya ki KHushi ke liye
kar diya us ne muntaqil ghar bhi
jo tamanna hai puri kar lije
pesh hai sar bhi aur patthar bhi
jis ke band-e-naqab khulte na the
kya hui us ke sar ki chadar bhi
jab paron ko hawa katarti hai
sath dete nahin hain shahpar bhi
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
