numu ki aag se miTTi tahi thi karte kya

numū kī aag se miTTī tahī thī karte kyā

zamīñ kī kokh se dīvār-o-dar ubharte kyā

vo āsmāñ pe kahīñ thā zamīn par ham the

hamāre haath kabūtar ke par kutarte kyā

nazar thī abr kī fankāriyoñ meñ khoī huī

to ham ḳhayāl ke ḳhākoñ meñ rang bharte kyā

pasand aa ga.iiñ sahrā-navardiyāñ ham ko

junūñ-navāz thī fitrat ḳhirad pe marte kyā

ḳhalā kā rizq the āḳhir ḳhalā ke kaam aa.e

falak se aa ke sitāre zamīñ pe karte kyā

ham aise sahl-pasandoñ se duur rahte haiñ

jidhar thī bhiiḌ usī raah se guzarte kyā

jamāl-e-sāda ke sho.aloñ se jal rahe the ḳhayāl

vo yūñhī husn kā me.aar the sañvarte kyā

kisī tilism ne zehnoñ ko bāñdh rakkhā thā

ham apne aap meñ kab the kahīñ Thaharte kyā

shikastagī ke kuchh asbāb chāhiyeñ 'yāvar'

chalā na sang koī TūTte bikharte kyā

numu ki aag se miTTi tahi thi karte kya

zamin ki kokh se diwar-o-dar ubharte kya

wo aasman pe kahin tha zamin par hum the

hamare hath kabutar ke par kutarte kya

nazar thi abr ki fankariyon mein khoi hui

to hum KHayal ke KHakon mein rang bharte kya

pasand aa gain sahra-nawardiyan hum ko

junun-nawaz thi fitrat KHirad pe marte kya

KHala ka rizq the aaKHir KHala ke kaam aae

falak se aa ke sitare zamin pe karte kya

hum aise sahl-pasandon se dur rahte hain

jidhar thi bhiD usi rah se guzarte kya

jamal-e-sada ke shoalon se jal rahe the KHayal

wo yunhi husn ka mear the sanwarte kya

kisi tilism ne zehnon ko bandh rakkha tha

hum apne aap mein kab the kahin Thaharte kya

shikastagi ke kuchh asbab chahiyen 'yawar'

chala na sang koi TuTte bikharte kya