numu ko shaKH ke aasar tak pahunchna hai

numū ko shāḳh ke āsār tak pahuñchnā hai

bikhar ke phuul ne mahkār tak pahuñchnā hai

ham apnī saltanat-e-sher meñ bahut ḳhush haiñ

vo aur haiñ jinheñ darbār tak pahuñchnā hai

ġharīb-e-shahr ke bahte lahū kā zikr faqat

vo surḳhiyāñ jinheñ aḳhbār tak pahuñchnā hai

hameñ jo chup sī lagī hai ye be-sabab to nahīñ

kisī ḳhayāl ko iz.hār tak pahuñchnā hai

tilism-e-umr kī tārīf saarī itnī sī

ik aa.ina jise zangār tak pahuñchnā hai

kuchh aise log jo shānoñ pe sar nahīñ rakhte

magar ye zo.am ki dastār tak pahuñchnā hai

vo din ga.e ki koī ashk poñchhne aa.e

yahāñ to aap ko ġham-ḳhvār tak pahuñchnā hai

numu ko shaKH ke aasar tak pahunchna hai

bikhar ke phul ne mahkar tak pahunchna hai

hum apni saltanat-e-sher mein bahut KHush hain

wo aur hain jinhen darbar tak pahunchna hai

gharib-e-shahr ke bahte lahu ka zikr faqat

wo surKHiyan jinhen aKHbar tak pahunchna hai

hamein jo chup si lagi hai ye be-sabab to nahin

kisi KHayal ko izhaar tak pahunchna hai

tilism-e-umr ki tarif sari itni si

ek aaina jise zangar tak pahunchna hai

kuchh aise log jo shanon pe sar nahin rakhte

magar ye zoam ki dastar tak pahunchna hai

wo din gae ki koi ashk ponchhne aae

yahan to aap ko gham-KHwar tak pahunchna hai