nuqush-e-pa mein tajalli wajud ki baba

nuqūsh-e-pā meñ tajallī vajūd kī baabā

tamām raah meñ ḳhushbū hai uud kī baabā

tilismī haale meñ rahtā hai māh-e-āzādī

ajiib sūrateñ dekhīñ quyūd kī baabā

ye āñdhiyāñ na bujhā deñ charāġh-e-dil kī lau

ki hai shanāḳht ye apne vajūd kī baabā

qulūb-e-dīda-varāñ ko lahū rulātī hai

rag-e-hayāt meñ gardish jumūd kī baabā

yuuñ ḳhār-zār meñ khīñcho na ruuh kā dāman

mujhe havas nahīñ nām-o-numūd kī baabā

kabhī kabhī to habāb-e-muhīt-e-fikr meñ bhī

milī haiñ vus.ateñ charḳh-e-kabūd kī baabā

tajallī-zār huā hai ġhazal kā ā.īna

ye barkateñ haiñ salām-o-darūd kī baabā

'matīn' vaqt ne kaise ye din dikhā.e haiñ

haiñ chaar roTiyāñ qīmat sujūd kī baabā

nuqush-e-pa mein tajalli wajud ki baba

tamam rah mein KHushbu hai ud ki baba

tilismi haale mein rahta hai mah-e-azadi

ajib suraten dekhin quyud ki baba

ye aandhiyan na bujha den charagh-e-dil ki lau

ki hai shanaKHt ye apne wajud ki baba

qulub-e-dida-waran ko lahu rulati hai

rag-e-hayat mein gardish jumud ki baba

yun KHar-zar mein khincho na ruh ka daman

mujhe hawas nahin nam-o-numud ki baba

kabhi kabhi to habab-e-muhit-e-fikr mein bhi

mili hain wusaten charKH-e-kabud ki baba

tajalli-zar hua hai ghazal ka aaina

ye barkaten hain salam-o-darud ki baba

'matin' waqt ne kaise ye din dikhae hain

hain chaar roTiyan qimat sujud ki baba