nuh ka tufan ek aansu se barpa kijiye

nuuh kā tūfān ik aañsū se barpā kījiye

jī meñ aatā hai ki ab qatre ko dariyā kījiye

be-ḳhabar ban jā.iye yā ahd puurā kījiye

jis tarah se aap kā jī chāhe achchhā kījiye

īsī-e-daurāñ sahī lekin koī shāhid bhī ho

ham abhī to jī uTheñge aap ishārā kījiye

ho chukā honā thā jo kuchh jā.iye bas jā.iye

marne vaale ko na ab lillāh rusvā kījiye

phir zarā jhalkī dikhā kar ik zarā chhup jā.iye

dil ke har zarre meñ ābād ek duniyā kījiye

dil hamārā hai ham is ke haiñ azal se rāz-dār

aap ḳhud aa kar sar-e-bāzār rusvā kījiye

kaun kahtā hai ki in qissoñ ko phir dohrā.iye

dil kī ābādī miTā kar zikr-e-sahrā kījiye

rāzdārī ishq meñ 'ālim' nahīñ chhoTī sī baat

dil hī dil meñ sochtā rahtā huuñ ab kyā kījiye

nuh ka tufan ek aansu se barpa kijiye

ji mein aata hai ki ab qatre ko dariya kijiye

be-KHabar ban jaiye ya ahd pura kijiye

jis tarah se aap ka ji chahe achchha kijiye

isi-e-dauran sahi lekin koi shahid bhi ho

hum abhi to ji uThenge aap ishaara kijiye

ho chuka hona tha jo kuchh jaiye bas jaiye

marne wale ko na ab lillah ruswa kijiye

phir zara jhalki dikha kar ek zara chhup jaiye

dil ke har zarre mein aabaad ek duniya kijiye

dil hamara hai hum is ke hain azal se raaz-dar

aap KHud aa kar sar-e-bazar ruswa kijiye

kaun kahta hai ki in qisson ko phir dohraiye

dil ki aabaadi miTa kar zikr-e-sahra kijiye

raazdari ishq mein 'alim' nahin chhoTi si baat

dil hi dil mein sochta rahta hun ab kya kijiye