nur andhere ki fasilon pe saja deta hun

nuur añdhere kī fasīloñ pe sajā detā huuñ

maiñ siyāh-baḳht charāġhoñ ko jalā detā huuñ

pahle ik jism banātā huuñ kisī phuul pe phir

ek chehrā kisī patthar pe banā detā huuñ

din nikalte hī kise DhūñDne jaatā huuñ maiñ

raat ke pichhle pahar kis ko sadā detā huuñ

ek arse se ġham-e-hijr meñ masrūf hai tū

aa mire dil meñ tujhe kaam nayā detā huuñ

mujh sā saade bhī koī hogā zamāne meñ ki maiñ

apne qātil ko bhī umroñ kī duā detā huuñ

bahte dariyā kā badan Dhāñk ke ḳhushk āñkhoñ se

mom ke qalb ko patthar ki qabā detā huuñ

mustaqil rāh-e-suḳhan kā huuñ musāfir 'nāyāb'

gar thakan likh duuñ varaq par to miTā detā huuñ

nur andhere ki fasilon pe saja deta hun

main siyah-baKHt charaghon ko jala deta hun

pahle ek jism banata hun kisi phul pe phir

ek chehra kisi patthar pe bana deta hun

din nikalte hi kise DhunDne jata hun main

raat ke pichhle pahar kis ko sada deta hun

ek arse se gham-e-hijr mein masruf hai tu

aa mere dil mein tujhe kaam naya deta hun

mujh sa sade bhi koi hoga zamane mein ki main

apne qatil ko bhi umron ki dua deta hun

bahte dariya ka badan Dhank ke KHushk aankhon se

mom ke qalb ko patthar ki qaba deta hun

mustaqil rah-e-suKHan ka hun musafir 'nayab'

gar thakan likh dun waraq par to miTa deta hun