nur ki kiran us se KHud nikalti rahti hai

nuur kī kiran us se ḳhud nikaltī rahtī hai

vaqt kaTtā rahtā hai raat Dhaltī rahtī hai

aur zikr kyā kiije apne dil kī hālat kā

kuchh bigaḌtī rahtī hai kuchh sañbhaltī rahtī hai

zehn ubhār detā hai naqsh hāl-o-māzī ke

in dinoñ tabī'at kuchh yuuñ bahaltī rahtī hai

tah-nashīn maujeñ to pur-sukūn rahtī haiñ

aur sat.h-e-dariyā kī mauj uchhaltī rahtī haiñ

zindagī 'ibārat hai zindagī ke moḌoñ se

pech-o-ḳham hoñ kitne hī raah chaltī rahtī hai

chāhe apne ġham kī ho yā ġham-e-zamāna kī

baat to bahar-sūrat kuchh nikaltī rahtī hai

zindagī hai naam is kā tāzgī hai kaam is kā

ek mauj-e-ḳhūñ dil se jo ubaltī rahtī hai

kaif bhī hai mastī bhī zahr bhī hai amrit bhī

vo jo jām-e-sāqī se roz Dhaltī rahtī hai

ḳhud vajūdiyat ho ye yā ho us kī tanhā.ī

ruuh ko magar koī shai masaltī rahtī hai

aaj bhī burī kyā hai kal bhī ye burī kyā thī

is kā naam duniyā hai ye badaltī rahtī hai

hotī hai vo she'roñ meñ mun’akis kabhī 'e'jāz'

muddatoñ ghuTan sī jo dil meñ paltī rahtī hai

nur ki kiran us se KHud nikalti rahti hai

waqt kaTta rahta hai raat Dhalti rahti hai

aur zikr kya kije apne dil ki haalat ka

kuchh bigaDti rahti hai kuchh sanbhalti rahti hai

zehn ubhaar deta hai naqsh haal-o-mazi ke

in dinon tabi'at kuchh yun bahalti rahti hai

tah-nashin maujen to pur-sukun rahti hain

aur sath-e-dariya ki mauj uchhalti rahti hain

zindagi 'ibarat hai zindagi ke moDon se

pech-o-KHam hon kitne hi rah chalti rahti hai

chahe apne gham ki ho ya gham-e-zamana ki

baat to bahar-surat kuchh nikalti rahti hai

zindagi hai nam is ka tazgi hai kaam is ka

ek mauj-e-KHun dil se jo ubalti rahti hai

kaif bhi hai masti bhi zahr bhi hai amrit bhi

wo jo jam-e-saqi se roz Dhalti rahti hai

KHud wajudiyat ho ye ya ho us ki tanhai

ruh ko magar koi shai masalti rahti hai

aaj bhi buri kya hai kal bhi ye buri kya thi

is ka nam duniya hai ye badalti rahti hai

hoti hai wo she'ron mein mun’akis kabhi 'e'jaz'

muddaton ghuTan si jo dil mein palti rahti hai