oDh kar dard ki is dhup ko jalte rahiye

oḌh kar dard kī is dhuup ko jalte rahiye

ḳhaar mil jaa.eñ to phir ḳhāroñ pe chalte rahiye

zindagī se hai pare chaah kī parchhā.īyāñ

raat din dard ke sannāToñ meñ palte rahiye

ek show ban ke tumheñ jiinā paḌegā har din

zahr jitnā bhī mile us ko nigalte rahiye

aap se koī bhī ummīd nahīñ marham kī

aap to sirf namak zaḳhmoñ pe malte rahiye

aur baḌh jā.egī kuchh rang-e-hinā.ī us kī

bas hathelī pe lahū ko mire malte rahiye

aap ke naam se mansūb ho ġhazleñ merī

lafz ban kar mire ash'ār meñ Dhalte rahiye

ḳhud-baḳhud haar ke insāf chalā jā.egā

sirf tārīḳh pe tārīḳh badalte rahiye

āstīnoñ meñ inheñ pālte rahiye lekin

in sapoloñ ke zarā phan bhī kuchalte rahiye

manzileñ duur haiñ par hausla rakhiye 'armān'

aap kā farz masāfat hai to chalte rahiye

oDh kar dard ki is dhup ko jalte rahiye

KHar mil jaen to phir KHaron pe chalte rahiye

zindagi se hai pare chah ki parchhaiyan

raat din dard ke sannaTon mein palte rahiye

ek show ban ke tumhein jina paDega har din

zahr jitna bhi mile us ko nigalte rahiye

aap se koi bhi ummid nahin marham ki

aap to sirf namak zaKHmon pe malte rahiye

aur baDh jaegi kuchh rang-e-hinai us ki

bas hatheli pe lahu ko mere malte rahiye

aap ke nam se mansub ho ghazlen meri

lafz ban kar mere ash'ar mein Dhalte rahiye

KHud-baKHud haar ke insaf chala jaega

sirf tariKH pe tariKH badalte rahiye

aastinon mein inhen palte rahiye lekin

in sapolon ke zara phan bhi kuchalte rahiye

manzilen dur hain par hausla rakhiye 'arman'

aap ka farz masafat hai to chalte rahiye