oDhi rida-e-dard bhi haalat ki tarah

oḌhī ridā-e-dard bhī hālāt kī tarah

tārīkiyoñ meñ Duub ga.e raat kī tarah

sheva nahīñ ki shola-e-ġham se kareñ gurez

har zaḳhm hai qubūl na.ī baat kī tarah

niiñd aa rahī hai karb kī āġhosh meñ mujhe

siine pe dast-e-ġham hai tire haat kī tarah

maiñ apne aap se kabhī bāhar na aa sakā

uljhā rahā huuñ ḳhud maiñ ḳhayālāt kī tarah

hairān huuñ ki ḳhud ko bhī pahchāntā nahīñ

jazbe badal rahe haiñ rusūmāt kī tarah

vo dauḌ hai ki apnī havā bhī na chhū sakūñ

uḌtī hai merī fikr bhī lamhāt kī tarah

kyā gul khilā.e merī udāsī kī lahr ne

zehnoñ ke reg-zār meñ barsāt kī tarah

kyā bastiyoñ kā zikr ki ehsās kī tapish

jañgal jalā ga.ī mire jazbāt kī tarah

kyā ḳhuub āshnā haiñ ki pahchānte nahīñ

jab bhī mile to pahlī mulāqāt kī tarah

duniyā kā dard apne dukhoñ meñ sameT kar

mahsūs kar rahā huuñ ġham-e-zāt kī tarah

ahbāb kis ḳhulūs se 'zulfī' mirī ġhazal

rakhte haiñ dil ke taaq meñ sauġhāt kī tarah

oDhi rida-e-dard bhi haalat ki tarah

tarikiyon mein Dub gae raat ki tarah

shewa nahin ki shola-e-gham se karen gurez

har zaKHm hai qubul nai baat ki tarah

nind aa rahi hai karb ki aaghosh mein mujhe

sine pe dast-e-gham hai tere hat ki tarah

main apne aap se kabhi bahar na aa saka

uljha raha hun KHud main KHayalat ki tarah

hairan hun ki KHud ko bhi pahchanta nahin

jazbe badal rahe hain rusumat ki tarah

wo dauD hai ki apni hawa bhi na chhu sakun

uDti hai meri fikr bhi lamhat ki tarah

kya gul khilae meri udasi ki lahr ne

zehnon ke reg-zar mein barsat ki tarah

kya bastiyon ka zikr ki ehsas ki tapish

jangal jala gai mere jazbaat ki tarah

kya KHub aashna hain ki pahchante nahin

jab bhi mile to pahli mulaqat ki tarah

duniya ka dard apne dukhon mein sameT kar

mahsus kar raha hun gham-e-zat ki tarah

ahbab kis KHulus se 'zulfi' meri ghazal

rakhte hain dil ke taq mein saughat ki tarah