ojhal hun nigahon se magar dil mein paDe ho

ojhal huuñ nigāhoñ se magar dil meñ paḌe ho

lailā kī tarah kaun se mahmil meñ paḌe ho

dar-parda sahī sehr-e-nazāra ke asar se

sau tarah se tum dīda-e-ġhāfil meñ paḌe ho

khulne lage asrār-e-vafā dīda-o-dil par

jis din se ġham-e-hijr kī mushkil meñ paḌe ho

āvārgī-e-dil bhī ga.ī qaid-e-vafā bhī

jis din se mohabbat ke salāsil meñ paḌe ho

har lahza badaltī huī duniyā ke makīno

kyā jāniye tum kaun sī manzil meñ paḌe ho

kis jurm kī tāzīr ye kis Dhab kī sazā hai

lazzat-kash-e-tanhā.ī ho mahfil meñ paḌe ho

kis tarah na fariyād kā phailā.eñ ye dāman

tum gul ho ki har ḳhvāb-e-anādil meñ paḌe ho

manzil kī talab saath hī sargarm-e-safar hai

dariyā ho magar halqa-e-sāhil meñ paḌe ho

har shai meñ nazar aatā hai ḳhud apnā hī chehra

ā.īne ke tum jaise muqābil meñ paḌe ho

kahtā hai 'nadīm' aaj mujhe dīda-e-bedār

tum barq ho aur ḳhirman-e-hāsil meñ paḌe ho

ojhal hun nigahon se magar dil mein paDe ho

laila ki tarah kaun se mahmil mein paDe ho

dar-parda sahi sehr-e-nazara ke asar se

sau tarah se tum dida-e-ghafil mein paDe ho

khulne lage asrar-e-wafa dida-o-dil par

jis din se gham-e-hijr ki mushkil mein paDe ho

aawargi-e-dil bhi gai qaid-e-wafa bhi

jis din se mohabbat ke salasil mein paDe ho

har lahza badalti hui duniya ke makino

kya jaaniye tum kaun si manzil mein paDe ho

kis jurm ki tazir ye kis Dhab ki saza hai

lazzat-kash-e-tanhai ho mahfil mein paDe ho

kis tarah na fariyaad ka phailaen ye daman

tum gul ho ki har KHwab-e-anadil mein paDe ho

manzil ki talab sath hi sargarm-e-safar hai

dariya ho magar halqa-e-sahil mein paDe ho

har shai mein nazar aata hai KHud apna hi chehra

aaine ke tum jaise muqabil mein paDe ho

kahta hai 'nadim' aaj mujhe dida-e-bedar

tum barq ho aur KHirman-e-hasil mein paDe ho