pa-ba-zanjir hain bebak sadaen kaisi

pā-ba-zanjīr haiñ bebāk sadā.eñ kaisī

qaid haiñ shahr-e-tamannā meñ havā.eñ kaisī

ham ne chehre to naqāboñ meñ chhupā rakkhe the

ā.inoñ meñ nazar aatī haiñ balā.eñ kaisī

har taraf apnā hī chehra nazar aatā hai mujhe

oḌh liiñ merī nigāhoñ ne dishā.eñ kaisī

saañs liije to kamāñ zaḳhm kī tan jaatī hai

sirf jiine kā qusūr aur sazā.eñ kaisī

devtā phir se bilote haiñ samundar shāyad

varna dhartī pe har ik samt vabā.eñ kaisī

paas pahuñche to vahī sifr alif ke uupar

duur se thiiñ yahī ḳhush-rang qabā.eñ kaisī

haath se haath na jaatā rahe gumrāhī kā

kyā pata aap na.ī raah batā.eñ kaisī

koī gardan-zadanī ho to hazāroñ hiile

baḳhshnā hī koī chāhe to ḳhatā.eñ kaisī

tursh ġhazleñ bhī 'muzaffar' kī mazā detī haiñ

mere baare meñ ye chaltī huī raa.eñ kaisī

pa-ba-zanjir hain bebak sadaen kaisi

qaid hain shahr-e-tamanna mein hawaen kaisi

hum ne chehre to naqabon mein chhupa rakkhe the

aainon mein nazar aati hain balaen kaisi

har taraf apna hi chehra nazar aata hai mujhe

oDh lin meri nigahon ne dishaen kaisi

sans lije to kaman zaKHm ki tan jati hai

sirf jine ka qusur aur sazaen kaisi

dewta phir se bilote hain samundar shayad

warna dharti pe har ek samt wabaen kaisi

pas pahunche to wahi sifr alif ke upar

dur se thin yahi KHush-rang qabaen kaisi

hath se hath na jata rahe gumrahi ka

kya pata aap nai rah bataen kaisi

koi gardan-zadani ho to hazaron hile

baKHshna hi koi chahe to KHataen kaisi

tursh ghazlen bhi 'muzaffar' ki maza deti hain

mere bare mein ye chalti hui raen kaisi