pabandi-e-hisar se aage nikal gae

pābandī-e-hisār se aage nikal ga.e

nafrat kī zid meñ pyaar se aage nikal ga.e

is darja iḳhtiyār use ḳhud pe de diyā

ham us ke iḳhtiyār se aage nikal ga.e

apne qadam ko apnī hī jānib baḌhā liyā

duniyā kī har qatār se aage nikal ga.e

āvāz dī ga.ī hameñ tāḳhīr se bahut

itnī ki ham pukār se aage nikal ga.e

muḌ kar bhī dekhne kī ijāzat nahīñ milī

ham bhī rah-e-ġhubār se aage nikal ga.e

jo log kār-e-ishq meñ masrūf ho ga.e

vo fikr-e-rozgār se aage nikal ga.e

jiinā muhāl shahr meñ itnā huā ki ham

marne ke intizār se aage nikal ga.e

pabandi-e-hisar se aage nikal gae

nafrat ki zid mein pyar se aage nikal gae

is darja iKHtiyar use KHud pe de diya

hum us ke iKHtiyar se aage nikal gae

apne qadam ko apni hi jaanib baDha liya

duniya ki har qatar se aage nikal gae

aawaz di gai hamein taKHir se bahut

itni ki hum pukar se aage nikal gae

muD kar bhi dekhne ki ijazat nahin mili

hum bhi rah-e-ghubar se aage nikal gae

jo log kar-e-ishq mein masruf ho gae

wo fikr-e-rozgar se aage nikal gae

jina muhaal shahr mein itna hua ki hum

marne ke intizar se aage nikal gae