pabandi-e-rahat mujhe manzur nahin hai

pābandī-e-rāhat mujhe manzūr nahīñ hai

maiñ ḳhush huuñ ki fitrat mirī majbūr nahīñ hai

bālīñ pe ziyā-e-ruḳh-e-pur-e-nūr nahīñ hai

ab koī ilāj-e-dil-e-ranjūr nahīñ hai

ab koī jagah husn se māmūr nahīñ hai

is dil ke sivā aur koī tuur nahīñ hai

karnā jo paḌe minnat-e-aġhyār ajab kyā

ye bhī mirī taqdīr se kuchh duur nahīñ hai

maiñ ne jo kahā jiitā huuñ ummīd-e-vafā par

farmāyā zamāne kā ye dastūr nahīñ hai

marne kī tamanna ho ki jiine kī ho ḳhvāhish

ik baat bhī merī nahīñ manzūr nahīñ hai

ham dair se hote hue ai shaiḳh chaleñge

is raah se ka.aba bhī koī duur nahīñ hai

o but tirā patthar kā kalejā bhī ho paanī

allāh kī qudrat se ye kuchh duur nahīñ hai

paimāna bhare detī haiñ saaqī kī nigāheñ

vo aañkh nahīñ aaj jo maḳhmūr nahīñ hai

kyā roz dikhātā hai na jaane ye dil-e-zār

ab tak to 'shamīm' aap kā mash.hūr nahīñ hai

pabandi-e-rahat mujhe manzur nahin hai

main KHush hun ki fitrat meri majbur nahin hai

baalin pe ziya-e-ruKH-e-pur-e-nur nahin hai

ab koi ilaj-e-dil-e-ranjur nahin hai

ab koi jagah husn se mamur nahin hai

is dil ke siwa aur koi tur nahin hai

karna jo paDe minnat-e-aghyar ajab kya

ye bhi meri taqdir se kuchh dur nahin hai

main ne jo kaha jita hun ummid-e-wafa par

farmaya zamane ka ye dastur nahin hai

marne ki tamanna ho ki jine ki ho KHwahish

ek baat bhi meri nahin manzur nahin hai

hum dair se hote hue ai shaiKH chalenge

is rah se kaba bhi koi dur nahin hai

o but tera patthar ka kaleja bhi ho pani

allah ki qudrat se ye kuchh dur nahin hai

paimana bhare deti hain saqi ki nigahen

wo aankh nahin aaj jo maKHmur nahin hai

kya roz dikhata hai na jaane ye dil-e-zar

ab tak to 'shamim' aap ka mashhur nahin hai