pagal si hawa Dhalti hui sham samundar

pāgal sī havā Dhaltī huī shaam samundar

aise hī kahīñ le na tirā naam samundar

vīrānoñ meñ bhaTkeñ ki tire shahr meñ Thahreñ

āñkhoñ meñ dar aatā hai sar-e-shām samundar

hai taaza havāoñ pe ye ilzām ki chup haiñ

kuchh aisā hī tujh par bhī hai ilzām samundar

kāġhaz kī banī naav meñ baiThe hue ham log

girdāb se nikle haiñ zarā thaam samundar

de izn ki paanī pe makāñ apne banā.eñ

ab saarī zamīñ ho ga.ī nīlām samundar

sunte haiñ vahāñ aks ubharte haiñ badan ke

chalte haiñ chalo ham bhī sar-e-shām samundar

kis vaqt zamīñ mere qadam lene lagī hai

jab rah gayā miTTī se bas ik gaam samundar

tū aks-e-falak hai to falak aa.ina terā

ik raqs-e-musalsal hai tirā kaam samundar

chaḌhte hue dariyā hoñ ki sūkhī huī nahreñ

rakhte haiñ tire sar sabhī ilzām samundar

kyā bhar ga.e paanī se labālab ki 'matīn' aaj

dene lage sahrāoñ ko dushnām samundar

pagal si hawa Dhalti hui sham samundar

aise hi kahin le na tera nam samundar

viranon mein bhaTken ki tere shahr mein Thahren

aankhon mein dar aata hai sar-e-sham samundar

hai taza hawaon pe ye ilzam ki chup hain

kuchh aisa hi tujh par bhi hai ilzam samundar

kaghaz ki bani naw mein baiThe hue hum log

girdab se nikle hain zara tham samundar

de izn ki pani pe makan apne banaen

ab sari zamin ho gai nilam samundar

sunte hain wahan aks ubharte hain badan ke

chalte hain chalo hum bhi sar-e-sham samundar

kis waqt zamin mere qadam lene lagi hai

jab rah gaya miTTi se bas ek gam samundar

tu aks-e-falak hai to falak aaina tera

ek raqs-e-musalsal hai tera kaam samundar

chaDhte hue dariya hon ki sukhi hui nahren

rakhte hain tere sar sabhi ilzam samundar

kya bhar gae pani se labaalab ki 'matin' aaj

dene lage sahraon ko dushnam samundar