pane ka zikr kya ki ganwana bahut hua

paane kā zikr kyā ki gañvānā bahut huā

dil us kī be-ruḳhī kā nishāna bahut huā

ḳhvāboñ kī gaThrī laad ke kab tak jiyeñge ham

palkoñ pe un kā baar uThānā bahut huā

hotā hai dard jab kabhī aa jaa.e us kā zikr

go zaḳhm-e-dil hamārā purānā bahut huā

mujh ko nahīñ qubūl tumhārā koī javāz

ab roz roz kā ye bahāna bahut huā

auroñ ke dard-o-ġham kā pata chal gayā hai nā

ab to hañso ki ronā rulānā bahut huā

tā'bīr chāhiye mujhe tadbīr kījiye

āñkhoñ ko ḳhvāb-vāb dikhānā bahut huā

'farzāna' koī baat ġhazal meñ na.ī kaho

zikr-e-visāl-o-hijr purānā bahut huā

pane ka zikr kya ki ganwana bahut hua

dil us ki be-ruKHi ka nishana bahut hua

KHwabon ki gaThri lad ke kab tak jiyenge hum

palkon pe un ka bar uThana bahut hua

hota hai dard jab kabhi aa jae us ka zikr

go zaKHm-e-dil hamara purana bahut hua

mujh ko nahin qubul tumhaara koi jawaz

ab roz roz ka ye bahana bahut hua

auron ke dard-o-gham ka pata chal gaya hai na

ab to hanso ki rona rulana bahut hua

ta'bir chahiye mujhe tadbir kijiye

aankhon ko KHwab-wab dikhana bahut hua

'farzana' koi baat ghazal mein nai kaho

zikr-e-visal-o-hijr purana bahut hua