pani ki dariya-pardaz ibarat bhi majhul gai

paanī kī dariyā-pardāz 'ibārat bhī maj.hūl ga.ī

sotoñ vaalī bel phūTne jhaḌne meñ mashġhūl ga.ī

naqsh-e-pā-e-sabz pe riijh ga.e to ye zanjīr kaTī

zard paañv kī vahshat thī ki safar kī kaḌiyāñ bhuul ga.ī

āvāzeñ rang-o-bū kī thiiñ so pak thak kar Tuut girīñ

ḳhāmoshī kī shāḳh bharī so hasb-e-samā'at jhuul ga.ī

kyā muta'addī fe'l huā miTTī kī azalī taḳhtī par

būdash kī tastīr musalsal miTne tak maf'ūl ga.ī

paud-gharoñ meñ shor uThā dāboñ ne kahā ham bāġhī haiñ

gamloñ kī tahrīk-e-bāġh muñDeroñ tak nirmūl ga.ī

āmad-e-ḳhvāb-e-dūr-darāz ko bhālte chehre bikhar ga.e

māh-o-sāl ke jhakkaḌ se bas darvāzoñ tak dhuul ga.ī

rauzan-e-chashm ke hone se ye navishta nazar-andāz huā

dekho is dīvār-e-dil kī ik ik iiñT fuzūl ga.ī

pani ki dariya-pardaz 'ibarat bhi majhul gai

soton wali bel phuTne jhaDne mein mashghul gai

naqsh-e-pa-e-sabz pe rijh gae to ye zanjir kaTi

zard panw ki wahshat thi ki safar ki kaDiyan bhul gai

aawazen rang-o-bu ki thin so pak thak kar Tut girin

KHamoshi ki shaKH bhari so hasb-e-sama'at jhul gai

kya muta'addi fe'l hua miTTi ki azali taKHti par

budash ki tastir musalsal miTne tak maf'ul gai

paud-gharon mein shor uTha dabon ne kaha hum baghi hain

gamlon ki tahrik-e-bagh munDeron tak nirmul gai

aamad-e-KHwab-e-dur-daraaz ko bhaalte chehre bikhar gae

mah-o-sal ke jhakkaD se bas darwazon tak dhul gai

rauzan-e-chashm ke hone se ye nawishta nazar-andaz hua

dekho is diwar-e-dil ki ek ek inT fuzul gai