paniyon se ret par jo aa gaya meri tarah

pāniyoñ se ret par jo aa gayā merī tarah

zindagī kī dhuup meñ jaltā rahā merī tarah

us ke hoñToñ se bhī amrit kī mahak aane lagī

ġhāliban zahr-e-halāhal pī liyā merī tarah

aap ko vo apnī rahmat se navāzegā zarūr

sidq-e-dil se māñgiye bhī to duā merī tarah

koī parde se nikal kar sāmne aa jā.egā

shart lekin ye hai tum bhī dekhnā merī tarah

sāhiloñ kī qaid se āzād ho saktā hai tū

apne dariyā meñ koī tūfāñ uThā merī tarah

kufr-o-bātil kī safoñ ko chiir kar bāhar nikal

naam apnā haq parastoñ meñ likhā merī tarah

anjuman-dar-anjuman tafrīq-e-ḳhās-o-ām hai

hai koī jo raaz kah de barmalā merī tarah

paniyon se ret par jo aa gaya meri tarah

zindagi ki dhup mein jalta raha meri tarah

us ke honTon se bhi amrit ki mahak aane lagi

ghaaliban zahr-e-halahal pi liya meri tarah

aap ko wo apni rahmat se nawazega zarur

sidq-e-dil se mangiye bhi to dua meri tarah

koi parde se nikal kar samne aa jaega

shart lekin ye hai tum bhi dekhna meri tarah

sahilon ki qaid se aazad ho sakta hai tu

apne dariya mein koi tufan uTha meri tarah

kufr-o-baatil ki safon ko chir kar bahar nikal

nam apna haq paraston mein likha meri tarah

anjuman-dar-anjuman tafriq-e-KHas-o-am hai

hai koi jo raaz kah de barmala meri tarah