panw ka dhyan to hai rah ka Dar koi nahin

paañv kā dhyān to hai raah kā Dar koī nahīñ

mujh ko lagtā hai mirā zād-e-safar koī nahīñ

ba.az auqāt to maiñ ḳhud pe bahut chīḳhtā huuñ

chīḳhtā huuñ ki udhar jaao jidhar koī nahīñ

sar pe dīvār kā saayā bhī udāsī hai mujhe

zāhiran aisī udāsī kā asar koī nahīñ

āḳhirī baar mujhe khīñch ke siine se lagā

aur phir dekh mujhe maut kā Dar koī nahīñ

ḳhud-kushī karte samay pūchhtā huuñ merā aziiz

aur āvāz sī aatī hai tū mar, koī nahīñ

bharī duniyā hai sisakne meñ jhijak hogī tumheñ

ye mirā dil hai idhar ro lo idhar koī nahīñ

ek din log mujhe taḳht-nashīñ dekheñge

yā ye dekheñge mirā jism hai sar koī nahīñ

us kī hijrat baḌā a.asāb-shikan sāneha thī

shahr to shahr hai jangal meñ shajar koī nahīñ

sub.h se raat kī māyūsī bhagāne kā sabab

koī to hotā mire dost magar koī nahīñ

be-ḳhayālī sī mujhe god meñ bhar letī hai

dar pe dastak ho to kah detā huuñ ghar koī nahīñ

panw ka dhyan to hai rah ka Dar koi nahin

mujh ko lagta hai mera zad-e-safar koi nahin

baz auqat to main KHud pe bahut chiKHta hun

chiKHta hun ki udhar jao jidhar koi nahin

sar pe diwar ka saya bhi udasi hai mujhe

zahiran aisi udasi ka asar koi nahin

aaKHiri bar mujhe khinch ke sine se laga

aur phir dekh mujhe maut ka Dar koi nahin

KHud-kushi karte samay puchhta hun mera aziz

aur aawaz si aati hai tu mar, koi nahin

bhari duniya hai sisakne mein jhijak hogi tumhein

ye mera dil hai idhar ro lo idhar koi nahin

ek din log mujhe taKHt-nashin dekhenge

ya ye dekhenge mera jism hai sar koi nahin

us ki hijrat baDa aasab-shikan saneha thi

shahr to shahr hai jangal mein shajar koi nahin

subh se raat ki mayusi bhagane ka sabab

koi to hota mere dost magar koi nahin

be-KHayali si mujhe god mein bhar leti hai

dar pe dastak ho to kah deta hun ghar koi nahin