panw kanTon pe to phulon pe nazar rakhte hain

paañv kāñToñ pe to phūloñ pe nazar rakhte haiñ

fikr-e-manzil hai baḌā 'azm-e-safar rakhte haiñ

bas unhīñ logoñ kī taqdīr badal saktī hai

jo guzarte hue har pal kī ḳhabar rakhte haiñ

un ko har haal meñ andesha-e-rusvā.ī hai

jo sadā ġhair ke 'aiboñ pe nazar rakhte haiñ

kaun qātil ko sazā de sake munsif ban ke

vo kahāñ haiñ jo parakhne kā hunar rakhte haiñ

gardish-e-vaqt kā chaltā nahīñ jaadū un par

ḳhud ko har haal meñ jo sīna-sipar rakhte haiñ

jauharī she'r-o-adab ke yahāñ chhupte haiñ kahāñ

apnī jeboñ meñ chhupā.e ye guhar rakhte haiñ

terī bātoñ meñ 'vajāhat' hai balā kī hikmat

dab hī jaate haiñ vo tujh se jo jigar rakhte haiñ

panw kanTon pe to phulon pe nazar rakhte hain

fikr-e-manzil hai baDa 'azm-e-safar rakhte hain

bas unhin logon ki taqdir badal sakti hai

jo guzarte hue har pal ki KHabar rakhte hain

un ko har haal mein andesha-e-ruswai hai

jo sada ghair ke 'aibon pe nazar rakhte hain

kaun qatil ko saza de sake munsif ban ke

wo kahan hain jo parakhne ka hunar rakhte hain

gardish-e-waqt ka chalta nahin jadu un par

KHud ko har haal mein jo sina-sipar rakhte hain

jauhari she'r-o-adab ke yahan chhupte hain kahan

apni jebon mein chhupae ye guhar rakhte hain

teri baaton mein 'wajahat' hai bala ki hikmat

dab hi jate hain wo tujh se jo jigar rakhte hain