panw ki KHak the to tere dar ke ho gae

paañv kī ḳhaak the to tire dar ke ho ga.e

andar havā le aa.ī hameñ ghar ke ho ga.e

ehsās-e-jāñ-kanī se adā kar diye tamām

saare hisāb arsa-e-mehshar ke ho ga.e

parchhā.iyoñ meñ jiine lage the ham is qadar

saa.e hamāre aaj barābar ke ho ga.e

sābit kare ye kaun ki in meñ bhī jaan thī

vo saare jism aaj jo patthar ke ho ga.e

haiñ khel is tamāshā-gah-e-zīst ke ajab

rutbe baḌe sabhī yahāñ joker ke ho ga.e

kyā jānte vo zaḳhm-e-jigar kis ke dam se hai

kāñToñ ko chhoḌ kar jo gul-e-tar ke ho ga.e

patte to juḌ ke phuul se zīnat the peḌ kī

shāḳh-e-hunar se kaT ga.e sarsar ke ho ga.e

tinkoñ kī zindagī meñ bhī aatā hai inqalāb

naale meñ bahte bahte samundar ke ho ga.e

panw ki KHak the to tere dar ke ho gae

andar hawa le aai hamein ghar ke ho gae

ehsas-e-jaan-kani se ada kar diye tamam

sare hisab arsa-e-mehshar ke ho gae

parchhaiyon mein jine lage the hum is qadar

sae hamare aaj barabar ke ho gae

sabit kare ye kaun ki in mein bhi jaan thi

wo sare jism aaj jo patthar ke ho gae

hain khel is tamasha-gah-e-zist ke ajab

rutbe baDe sabhi yahan joker ke ho gae

kya jaante wo zaKHm-e-jigar kis ke dam se hai

kanTon ko chhoD kar jo gul-e-tar ke ho gae

patte to juD ke phul se zinat the peD ki

shaKH-e-hunar se kaT gae sarsar ke ho gae

tinkon ki zindagi mein bhi aata hai inqalab

nale mein bahte bahte samundar ke ho gae