panw le aae mujhe wadi-e-pur-Khaar ke pas

paañv le aa.e mujhe vādī-e-pur-ḳhār ke paas

sar meñ saudā hai ki chaliye usī dīvār ke paas

mohtasib zid se tirī dil meñ yahī aatā hai

mai-kashī jā ke kareñ terī hī dīvār ke paas

ye na.ī tarz-e-sitam tum ne nikālī sāhib

merā ḳhat jaate ho paḌhvāne ko aġhyār ke paas

fasl-e-gul aa.ī hai phir dasht-navardī ho nasīb

paañv ke aable pahuñchā.eñge phir ḳhaar ke paas

na uThā ham ko ki saa.e kī tarah se bekār

ek muddat se paḌe haiñ tirī dīvār ke paas

duur se dekhte hī mujh ko kahā duur us ne

ab na jā.eñge kabhī aise dil-āzār ke paas

panw le aae mujhe wadi-e-pur-KHar ke pas

sar mein sauda hai ki chaliye usi diwar ke pas

mohtasib zid se teri dil mein yahi aata hai

mai-kashi ja ke karen teri hi diwar ke pas

ye nai tarz-e-sitam tum ne nikali sahib

mera KHat jate ho paDhwane ko aghyar ke pas

fasl-e-gul aai hai phir dasht-nawardi ho nasib

panw ke aable pahunchaenge phir KHar ke pas

na uTha hum ko ki sae ki tarah se bekar

ek muddat se paDe hain teri diwar ke pas

dur se dekhte hi mujh ko kaha dur us ne

ab na jaenge kabhi aise dil-azar ke pas