parsaon ne baDe zarf ka izhaar kiya

pārsāoñ ne baḌe zarf kā iz.hār kiyā

mujh ko bhī hurmat-e-zebā kā ḳharīdār kiyā

vo jo thā ḳhud kī numā.ish kā taraf-dār badan

ḳhud ko ḳhvābīda kiyā aur mujhe bedār kiyā

bāñdh kar shāḳh laboñ par vo tabassum ke gulāb

merī mā'sūm tamanna ko talabgār kiyā

tum ne tohfe meñ diye the jo dahakte bose

un kī ḳhushbū ne hī rusvā sar-e-bāzār kiyā

ek lamhe ko sahī diid kā mausam Thahre

kuchh sarāboñ ne mujhe tishna-e-dīdār kiyā

qalb āshob-zada 'isyāñ se hotā kyoñ hai

roz-e-mahshar kā mujhe jis ne ḳhatāvār kiyā

apnī sochoñ kī lakīroñ se tarāshā thā tumheñ

ḳhitta-e-jāñ pe magar tum ne hī āzār kiyā

dard kī dhuup meñ saaya thā sukūnat kā jo

shaam aa.ī to lipaT kar mujhe bezār kiyā

jis kī mā'sūm adāoñ pe yaqīñ thā 'aḳhtar'

us ne pākīzgī se mujh ko gunahgār kiyā

parsaon ne baDe zarf ka izhaar kiya

mujh ko bhi hurmat-e-zeba ka KHaridar kiya

wo jo tha KHud ki numaish ka taraf-dar badan

KHud ko KHwabida kiya aur mujhe bedar kiya

bandh kar shaKH labon par wo tabassum ke gulab

meri ma'sum tamanna ko talabgar kiya

tum ne tohfe mein diye the jo dahakte bose

un ki KHushbu ne hi ruswa sar-e-bazar kiya

ek lamhe ko sahi did ka mausam Thahre

kuchh sarabon ne mujhe tishna-e-didar kiya

qalb aashob-zada 'isyan se hota kyon hai

roz-e-mahshar ka mujhe jis ne KHatawar kiya

apni sochon ki lakiron se tarasha tha tumhein

KHitta-e-jaan pe magar tum ne hi aazar kiya

dard ki dhup mein saya tha sukunat ka jo

sham aai to lipaT kar mujhe bezar kiya

jis ki ma'sum adaon pe yaqin tha 'aKHtar'

us ne pakizgi se mujh ko gunahgar kiya