pas apne bhi to pahle se wo jazbaat nahin

paas apne bhī to pahle se vo jazbāt nahīñ

dosh rahbar hī ko denā to bhalī baat nahīñ

merī nazroñ meñ taraf-dār hai vo jhuuT kā bas

vo jo kahtā hai ki sach kahne ke hālāt nahīñ

mere lahje meñ bhalā kis liye larzish hogī

maiñ ne haq māñgā hai sultān se ḳhairāt nahīñ

maat mujh ko huī apnī hī ḳhatā se varna

merī taqdīr meñ ai dost kahīñ maat nahīñ

phir kabhī vaqt nikālo ki mileñ jī bhar ke

muḳhtasar sī ye mulāqāt mulāqāt nahīñ

dil na TuuTe kabhī terā ye du'ā hai merī

tū ne toḌā hai mirā dil to koī baat nahīñ

vo mujhe chhoḌ gayā hai to ye lagtā hai 'zafar'

din bhī pahlā sā nahīñ raat bhī vo raat nahīñ

pas apne bhi to pahle se wo jazbaat nahin

dosh rahbar hi ko dena to bhali baat nahin

meri nazron mein taraf-dar hai wo jhuT ka bas

wo jo kahta hai ki sach kahne ke haalat nahin

mere lahje mein bhala kis liye larzish hogi

main ne haq manga hai sultan se KHairaat nahin

mat mujh ko hui apni hi KHata se warna

meri taqdir mein ai dost kahin mat nahin

phir kabhi waqt nikalo ki milen ji bhar ke

muKHtasar si ye mulaqat mulaqat nahin

dil na TuTe kabhi tera ye du'a hai meri

tu ne toDa hai mera dil to koi baat nahin

wo mujhe chhoD gaya hai to ye lagta hai 'zafar'

din bhi pahla sa nahin raat bhi wo raat nahin