pas-e-wafa ka mujhko ehsas hai yahan tak

pās-e-vafā kā mujh ko ehsās hai yahāñ tak

dil ro rahā hai lekin lab par nahīñ fuġhāñ tak

kitnī rivāyatoñ meñ tarmīm ho rahī hai

pahuñchā hai jab se insāñ dahlīz-e-āsmāñ tak

barsoñ uThā.e ham ne ehsān ratjagoñ ke

barsoñ ke baa'd pahuñche ham mansab-e-fuġhāñ tak

peḌoñ pe shāḳhchoñ kā phir jism TūTtā hai

phir zahr-e-habs phailā har-shāḳh-e-gulsitāñ tak

tārīkiyoñ meñ shab kī jo diip jal rahe the

is sub.h-e-nau meñ un kā miltā nahīñ dhuāñ tak

kitne ḳhalīq saa.e ab dhuup de rahe haiñ

pahuñchā huuñ jab se 'sāġhar' maiñ nudrat-e-bayāñ tak

pas-e-wafa ka mujh ko ehsas hai yahan tak

dil ro raha hai lekin lab par nahin fughan tak

kitni riwayaton mein tarmim ho rahi hai

pahuncha hai jab se insan dahliz-e-asman tak

barson uThae hum ne ehsan ratjagon ke

barson ke ba'd pahunche hum mansab-e-fughan tak

peDon pe shaKHchon ka phir jism TuTta hai

phir zahr-e-habs phaila har-shaKH-e-gulsitan tak

tarikiyon mein shab ki jo dip jal rahe the

is subh-e-nau mein un ka milta nahin dhuan tak

kitne KHaliq sae ab dhup de rahe hain

pahuncha hun jab se 'saghar' main nudrat-e-bayan tak