pas se yun aanchal lahraate log guzarte rahte hain

paas se yuuñ āñchal lahrāte log guzarte rahte haiñ

mere badan meñ qaus-e-quzah ke rañg utarte rahte haiñ

apne andar chhupe hue dushman kā hai ehsās jinheñ

merī tarah vo log bhī apne aap se Darte rahte haiñ

ham ne dekhnā chhoḌ diye haiñ ik muddat se aise ḳhvāb

ta.abīroñ kī chāhat meñ jo ḳhvāb ki marte rahte haiñ

raah meñ chāhe dhuup kaḌī ho yā saa.e bāheñ phailā.eñ

jin kā kaam guzarnā hai vo log guzarte rahte haiñ

laakh shanāsā ho par ḳhushbū kis ko dikhā.ī detī hai

ek hamīñ haiñ der talak aaheñ jo bharte rahte haiñ

vāsta paḌtā hī rahtā hai tez havāoñ se apnā

ham be-ghar logoñ ke aksar jism bikharte rahte haiñ

sub.h-savere ghar se 'ḳhāvar' nikle ho phir dhyān rahe

kālī-rāt ke lamhe din kā ruup bhī dharte rahte haiñ

pas se yun aanchal lahraate log guzarte rahte hain

mere badan mein qaus-e-quzah ke rang utarte rahte hain

apne andar chhupe hue dushman ka hai ehsas jinhen

meri tarah wo log bhi apne aap se Darte rahte hain

hum ne dekhna chhoD diye hain ek muddat se aise KHwab

tabiron ki chahat mein jo KHwab ki marte rahte hain

rah mein chahe dhup kaDi ho ya sae bahen phailaen

jin ka kaam guzarna hai wo log guzarte rahte hain

lakh shanasa ho par KHushbu kis ko dikhai deti hai

ek hamin hain der talak aahen jo bharte rahte hain

wasta paDta hi rahta hai tez hawaon se apna

hum be-ghar logon ke aksar jism bikharte rahte hain

subh-sawere ghar se 'KHawar' nikle ho phir dhyan rahe

kali-raat ke lamhe din ka rup bhi dharte rahte hain