pas uske mere gham ka mudawa bhi nahin hai

paas us ke mire ġham kā mudāvā bhī nahīñ hai

lekin mujhe us shaḳhs se shikva bhī nahīñ hai

kyā ilm thā ye din bhī dikhā.egī mohabbat

vo aise milā jaise shanāsā bhī nahīñ hai

āñchal pe tire Taañk to detā dam-e-ruḳhsat

palkoñ pe mirī koī sitāra bhī nahīñ hai

hairān huuñ maiñ aaj sar-e-jāda-e-iḳhlās

tā-dūr koī naqsh-e-kaf-e-pā bhī nahīñ hai

kuchh habs to TuuTe ki tirī yaad kā bādal

khultā bhī nahīñ aur barastā bhī nahīñ hai

'ābid' ġham-e-hastī se nikal jā.eñge bach kar

is baab meñ ham ne kabhī sochā bhī nahīñ hai

pas us ke mere gham ka mudawa bhi nahin hai

lekin mujhe us shaKHs se shikwa bhi nahin hai

kya ilm tha ye din bhi dikhaegi mohabbat

wo aise mila jaise shanasa bhi nahin hai

aanchal pe tere Tank to deta dam-e-ruKHsat

palkon pe meri koi sitara bhi nahin hai

hairan hun main aaj sar-e-jada-e-iKHlas

ta-dur koi naqsh-e-kaf-e-pa bhi nahin hai

kuchh habs to TuTe ki teri yaad ka baadal

khulta bhi nahin aur barasta bhi nahin hai

'abid' gham-e-hasti se nikal jaenge bach kar

is bab mein hum ne kabhi socha bhi nahin hai