pate hain apne ko ab tak lutf se begana hum

paate haiñ apne ko ab tak lutf se begāna ham

ai haram vaale kareñ ābād kyā but-ḳhāna ham

mere dīvāne kahā thā tū ne ik din naaz se

ab tak apne ko samajhte haiñ tirā dīvāna ham

husn ko apne liye ik aa.ina darkār thā

mahv-e-hairat the hue vaqf-e-ruḳh-e-jānāna ham

tum kaho to pher leñ apnī haqīqat se bhī aañkh

tum suno to chheḌ deñ koī nayā afsāna ham

chāhte haiñ vo hamārī hī taraf maa.il rahe

us kī bazm-e-nāz ko samjhe haiñ ḳhalvat-ḳhāna ham

dekheñ kyā aa.e nazar ḳhākistar-e-parvāna meñ

dekhte haiñ sham.a meñ soz-e-dil-e-parvāna ham

vaqt Dālegā hamārī bhī haqīqat par naqāb

vo bhī din aa.egā jab ho jā.eñge afsāna ham

lauTte kyā tere maiḳhāne se be-nail-e-marām

mai na haath aa.ī to ġham se bhar chale paimāna ham

jā-ba-jā aatā gayā us kī navāzish kā bayāñ

apne dil kā der tak kahte rahe afsāna ham

laḌkhaḌātā dekh kar saaqī sahāre ko baḌhā

aa qadam le leñ tire ai laġhzish-e-mastāna ham

us kā afsūn-e-nazar hai apnā unvān-e-kalām

us ke afsūñ hī kā 'āsif' kahte haiñ afsāna ham

pate hain apne ko ab tak lutf se begana hum

ai haram wale karen aabaad kya but-KHana hum

mere diwane kaha tha tu ne ek din naz se

ab tak apne ko samajhte hain tera diwana hum

husn ko apne liye ek aaina darkar tha

mahw-e-hairat the hue waqf-e-ruKH-e-jaanana hum

tum kaho to pher len apni haqiqat se bhi aankh

tum suno to chheD den koi naya afsana hum

chahte hain wo hamari hi taraf mail rahe

us ki bazm-e-naz ko samjhe hain KHalwat-KHana hum

dekhen kya aae nazar KHakistar-e-parwana mein

dekhte hain shama mein soz-e-dil-e-parwana hum

waqt Dalega hamari bhi haqiqat par naqab

wo bhi din aaega jab ho jaenge afsana hum

lauTte kya tere maiKHane se be-nail-e-maram

mai na hath aai to gham se bhar chale paimana hum

ja-ba-ja aata gaya us ki nawazish ka bayan

apne dil ka der tak kahte rahe afsana hum

laDkhaData dekh kar saqi sahaare ko baDha

aa qadam le len tere ai laghzish-e-mastana hum

us ka afsun-e-nazar hai apna unwan-e-kalam

us ke afsun hi ka 'asif' kahte hain afsana hum