paD gae kyon mere pichhe hain ajab ustad ji

paḌ ga.e kyoñ mere pīchhe haiñ ajab ustād jī

aa ga.e tashīh karne be-sabab ustād jī

chāñd chehre ko ghaTā zulfoñ ko kahte haiñ mirī

saare Tharkī āshiqoñ meñ haiñ ġhazab ustād jī

matl.a se maqtā talak saarī ġhazal tharrā uThe

aa.eñ jab mujh ko sikhāne she.rī Dhab ustād jī

un ko batlā do jalānā paḌtā hai ḳhūn-e-jigar

yūñhī ban jaate nahīñ haiñ sab ke sab ustād jī

jī meñ aatā hai ki maiñ sar phoḌ luuñ dīvār se

apne hī ash.ār likhvāte haiñ jab ustād jī

koī to aa kar nikāle un ke changul se mujhe

mujh ko pāgal kar rahe haiñ roz-o-shab ustād jī

ehtirām un kā hai vājib mujh pe lekin kyā kahūñ

mujh sī ahqar ke liye haiñ be-adab ustād jī

jaane kab mil jaa.e mujh se bhī zahīn ik shā.era

mujh ko tanhā chhoḌ jaa.eñ jaane kab ustād jī

sach kahūñ assī ke pīThe meñ bhī lagte haiñ javāñ

haiñ hasīnoñ meñ hī kyoñ phir jāñ-ba-lab ustād jī

haañ magar kuchh dost aise haiñ bahut dil ke qarīñ

jin se mil kar yuuñ lage hai sirf rab ustād jī

jab se likhī hai ġhazal 'sīmā' ḳhafā haiñ jaane kyoñ

Dar hai raazī ho na jaa.eñ phir se ab ustād jī

paD gae kyon mere pichhe hain ajab ustad ji

aa gae tashih karne be-sabab ustad ji

chand chehre ko ghaTa zulfon ko kahte hain meri

sare Tharki aashiqon mein hain ghazab ustad ji

matla se maqta talak sari ghazal tharra uThe

aaen jab mujh ko sikhane sheri Dhab ustad ji

un ko batla do jalana paDta hai KHun-e-jigar

yunhi ban jate nahin hain sab ke sab ustad ji

ji mein aata hai ki main sar phoD lun diwar se

apne hi ashaar likhwate hain jab ustad ji

koi to aa kar nikale un ke changul se mujhe

mujh ko pagal kar rahe hain roz-o-shab ustad ji

ehtiram un ka hai wajib mujh pe lekin kya kahun

mujh si ahqar ke liye hain be-adab ustad ji

jaane kab mil jae mujh se bhi zahin ek shaera

mujh ko tanha chhoD jaen jaane kab ustad ji

sach kahun assi ke piThe mein bhi lagte hain jawan

hain hasinon mein hi kyon phir jaan-ba-lab ustad ji

han magar kuchh dost aise hain bahut dil ke qarin

jin se mil kar yun lage hai sirf rab ustad ji

jab se likhi hai ghazal 'sima' KHafa hain jaane kyon

Dar hai raazi ho na jaen phir se ab ustad ji