paDa hua hun tere pas itna sara main

paḌā huā huuñ tire paas itnā saarā maiñ

aur is ke baad bhī kam par karūñ guzārā maiñ

ba-shakl-e-sabza-o-gul ab nikal rahā huuñ jahāñ

gayā thā lā ke inhīñ jañgaloñ meñ maarā maiñ

bahut havas thī mujhe be-panāh hone kī

paḌī vo zarb girā ho ke pāra-pāra maiñ

tire navāh meñ ab bhī bahut huuñ bikhrā huā

huā nahīñ huuñ abhī jam.a tujh se saarā maiñ

ziyāda hai tū bahut aur maiñ bahut kam huuñ

tū suud hai mirā aur huuñ tirā ḳhasārā maiñ

jahāñ se toḌ diyā thā havā ne pichhlī baar

vahīñ se TūTne vaalā huuñ kyā dobāra maiñ

paDa hua hun tere pas itna sara main

aur is ke baad bhi kam par karun guzara main

ba-shakl-e-sabza-o-gul ab nikal raha hun jahan

gaya tha la ke inhin jangalon mein mara main

bahut hawas thi mujhe be-panah hone ki

paDi wo zarb gira ho ke para-para main

tere nawah mein ab bhi bahut hun bikhra hua

hua nahin hun abhi jama tujh se sara main

ziyaada hai tu bahut aur main bahut kam hun

tu sud hai mera aur hun tera KHasara main

jahan se toD diya tha hawa ne pichhli bar

wahin se TuTne wala hun kya dobara main