paDe hain zad mein sabhi meri aah ke ab tak

paḌe haiñ zad meñ sabhī merī aah ke ab tak

rahe gavāh jo jhūTe gunāh ke ab tak

na mohtasib hue hāl-e-tabāh ke ab tak

vo haiñ rahīn usī rasm-o-rāh ke ab tak

gunāh kar ke hue jo kabhī na sharminda

bhugat rahe haiñ natīje gunāh ke ab tak

bas ik yahī to hai sarmāya-e-hayāt mirā

haiñ naqsh dil pe jame terī chaah ke ab tak

vo ik nazāra-e-dil-doz ham ne dekhā thā

sulag rahe haiñ darīche nigāh ke ab tak

unheñ bhī manzil-e-maqsūd ho 'atā yārab

ruke hue haiñ musāfir jo raah ke ab tak

mukar ga.e haiñ ka.ī zaḳhm de ke vo 'dā.em'

jo ham se karte the vā'de nibāh ke ab tak

paDe hain zad mein sabhi meri aah ke ab tak

rahe gawah jo jhuTe gunah ke ab tak

na mohtasib hue haal-e-tabah ke ab tak

wo hain rahin usi rasm-o-rah ke ab tak

gunah kar ke hue jo kabhi na sharminda

bhugat rahe hain natije gunah ke ab tak

bas ek yahi to hai sarmaya-e-hayat mera

hain naqsh dil pe jame teri chah ke ab tak

wo ek nazara-e-dil-doz hum ne dekha tha

sulag rahe hain dariche nigah ke ab tak

unhen bhi manzil-e-maqsud ho 'ata yarab

ruke hue hain musafir jo rah ke ab tak

mukar gae hain kai zaKHm de ke wo 'daem'

jo hum se karte the wa'de nibah ke ab tak