paDh ke dekhe koi lagae hisab

paḌh ke dekhe koī lagā.e hisāb

zindagānī hai mas.aloñ kī kitāb

ab gadā.ī se kuchh nahīñ hāsil

mil gayā hai har ek dar se javāb

ye jo chāheñ to raah meñ lūTeñ

aise rahbar haiñ āj-kal ke janāb

sub.h jalva-numā.ī kartī hai

raat hai us ke ruḳh kī ek naqāb

kaun ab zindagī ko samjhā.e

maut ḳhud hī hai zindagī kā javāb

phir bhī matlab na koī jaan sakā

laakh dohrā.ī zindagī kī kitāb

ābla-pā junūñ ke sahrā meñ

ham bhī ulTā kiye ḳhirad kī naqāb

maiñ bahut din se chup huuñ 'sailānī'

kis ne chheḌā hai zindagī kā rabāb

paDh ke dekhe koi lagae hisab

zindagani hai masalon ki kitab

ab gadai se kuchh nahin hasil

mil gaya hai har ek dar se jawab

ye jo chahen to rah mein luTen

aise rahbar hain aaj-kal ke janab

subh jalwa-numai karti hai

raat hai us ke ruKH ki ek naqab

kaun ab zindagi ko samjhae

maut KHud hi hai zindagi ka jawab

phir bhi matlab na koi jaan saka

lakh dohrai zindagi ki kitab

aabla-pa junun ke sahra mein

hum bhi ulTa kiye KHirad ki naqab

main bahut din se chup hun 'sailani'

kis ne chheDa hai zindagi ka rabab