paDhi gai na wo tahrir-e-gham jabinon se

paḌhī ga.ī na vo tahrīr-e-ġham jabīnoñ se

jo poñchhtī rahī ashkoñ ko āstīnoñ se

kabhī na degī sahārā shikastagī dil kī

safar na kījiye TuuTe hue safīnoñ se

tire ḳhayāl kī bārish meñ bhīgne ke liye

taras rahe haiñ asīrān-e-dil mahīnoñ se

samajh na pā.eñge ye zāhidān-e-sāda dil

diloñ meñ aag bhaḌaktī hai ābgīnoñ se

shikast-e-jām muqaddar ko mānñe vaale

sharāb koī ho bantī hai vo pasīnoñ se

bujhe charāġh sitāroñ ke dil laraz uTThe

nigār-e-sub.h utarne lagī hai zīnoñ se

unheñ sañbhālne meñ umr kaT ga.ī hai 'fahīm'

hamārī sīpiyāñ kuchh kam nahīñ nagīnoñ se

paDhi gai na wo tahrir-e-gham jabinon se

jo ponchhti rahi ashkon ko aastinon se

kabhi na degi sahaara shikastagi dil ki

safar na kijiye TuTe hue safinon se

tere KHayal ki barish mein bhigne ke liye

taras rahe hain asiran-e-dil mahinon se

samajh na paenge ye zahidan-e-sada dil

dilon mein aag bhaDakti hai aabginon se

shikast-e-jam muqaddar ko manne wale

sharab koi ho banti hai wo pasinon se

bujhe charagh sitaron ke dil laraz uTThe

nigar-e-subh utarne lagi hai zinon se

unhen sanbhaalne mein umr kaT gai hai 'fahim'

hamari sipiyan kuchh kam nahin naginon se