paDhne wala koi nahin tha sare likhne wale the

paḌhne vaalā koī nahīñ thā saare likhne vaale the

har ujle kāġhaz par kitne dhabbe kaale kaale the

har dam bañdhā rahā pairoñ se sahrā kā anjān safar

ham ne us ko sūraj maanā jis ke paañv meñ chhāle the

ham us anjānī bastī meñ kaise pahchāne jaate

tum bhī itnī duur khaḌe the jitnī duur ujāle the

bas ik dāġh-e-nākāmī thā jo sāñsoñ par likkhā rahā

vaise to bārish ne apne sab kapḌe dho Daale the

ham ne to uḌte dekhā hai sab ko khulī fazāoñ meñ

kis ke paañv meñ zanjīreñ thiiñ kin hoñToñ par taale the

is kā matlab maiñ ghar meñ thā aur soyā thā bistar par

āvezāñ khiḌkī darvāzoñ par makḌī ke jaale the

aisā hotā bin samjhā.e baat samajh meñ aa jaatī

nāhaq nā-dānoñ ne chādar bāhar paañv nikāle the

ġhaur se dekho vahāñ kahīñ se kuchh bādal guzre hoñge

āsmān kī jānib ham ne dariyā jahāñ uchhāle the

shāyad tum ne dekh liyā thā isī liye mahfūz rahe

vaise to 'parvāz' sabhī ne ham par Dore Daale the

paDhne wala koi nahin tha sare likhne wale the

har ujle kaghaz par kitne dhabbe kale kale the

har dam bandha raha pairon se sahra ka anjaan safar

hum ne us ko suraj mana jis ke panw mein chhaale the

hum us anjaani basti mein kaise pahchane jate

tum bhi itni dur khaDe the jitni dur ujale the

bas ek dagh-e-nakaami tha jo sanson par likkha raha

waise to barish ne apne sab kapDe dho Dale the

hum ne to uDte dekha hai sab ko khuli fazaon mein

kis ke panw mein zanjiren thin kin honTon par tale the

is ka matlab main ghar mein tha aur soya tha bistar par

aawezan khiDki darwazon par makDi ke jale the

aisa hota bin samjhae baat samajh mein aa jati

nahaq na-danon ne chadar bahar panw nikale the

ghaur se dekho wahan kahin se kuchh baadal guzre honge

aasman ki jaanib hum ne dariya jahan uchhaale the

shayad tum ne dekh liya tha isi liye mahfuz rahe

waise to 'parwaz' sabhi ne hum par Dore Dale the