pahaDon ko bichha dete kahin khai nahin milti

pahāḌoñ ko bichhā dete kahīñ khaa.ī nahīñ miltī

magar ūñche qadam rakhne ko ūñchā.ī nahīñ miltī

akelā chhoḌtā kab hai kisī ko lā-shu.ūr-e-tan

kisī tanhā.ī meñ bharpūr tanhā.ī nahīñ miltī

ġhanīmat hai ki ham ne chashm-e-hasrat paal rakkhī hai

zamāne ko ye hasrat bhī mire bhaa.ī nahīñ miltī

fusūn-e-reg meñ maujeñ bhī haiñ daldal bhī hote haiñ

magar sahrā samundar the ye sachchā.ī nahīñ miltī

tirī ḳhālis kiran kī aag hai taif-e-tasavvur meñ

quzah bantī nahīñ mujh meñ to bīnā.ī nahīñ miltī

nichoḌī jā chukī hai miTTī ikahrā ho gayā paanī

anāsir mil bhī jaate haiñ to ra.anā.ī nahīñ miltī

ġhazal kah ke sukūñ 'tafzīl' miltā hai magar miTTī

ise laavā ugal kar bhī shakebā.ī nahīñ miltī

pahaDon ko bichha dete kahin khai nahin milti

magar unche qadam rakhne ko unchai nahin milti

akela chhoDta kab hai kisi ko la-shuur-e-tan

kisi tanhai mein bharpur tanhai nahin milti

ghanimat hai ki hum ne chashm-e-hasrat pal rakkhi hai

zamane ko ye hasrat bhi mere bhai nahin milti

fusun-e-reg mein maujen bhi hain daldal bhi hote hain

magar sahra samundar the ye sachchai nahin milti

teri KHalis kiran ki aag hai taif-e-tasawwur mein

quzah banti nahin mujh mein to binai nahin milti

nichoDi ja chuki hai miTTi ikahra ho gaya pani

anasir mil bhi jate hain to ranai nahin milti

ghazal kah ke sukun 'tafzil' milta hai magar miTTi

ise lawa ugal kar bhi shakebai nahin milti