pahan kar dast-o-pa mein aahani zewar nikalte hain

pahan kar dast-o-pā meñ āhanī zevar nikalte haiñ

tire vahshī ba-sū-e-dār ban-Than kar nikalte haiñ

baġhāvat kī havā jab bhī dikhātī hai asar apnā

to phir sanjīda logoñ meñ bhī kuchh ḳhud-sar nikalte haiñ

koī mujh ko ye batlā.e ki ujle pairahan vaale

añdherī raat ke aalam meñ kyuuñ bāhar nikalte haiñ

jinheñ da.avā hai gulshan meñ guloñ kī pāsbānī kā

pas-e-parda vahī phūloñ ke saudā-gar nikalte haiñ

ham is bastī ko farzānoñ kī bastī kah nahīñ sakte

yahāñ to ik zarā sī baat par ḳhanjar nikalte haiñ

zamāne meñ 'zafar' logoñ kā andāza hī mushkil hai

jinheñ nāzuk badan samjho vahī patthar nikalte haiñ

pahan kar dast-o-pa mein aahani zewar nikalte hain

tere wahshi ba-su-e-dar ban-Than kar nikalte hain

baghawat ki hawa jab bhi dikhati hai asar apna

to phir sanjida logon mein bhi kuchh KHud-sar nikalte hain

koi mujh ko ye batlae ki ujle pairahan wale

andheri raat ke aalam mein kyun bahar nikalte hain

jinhen dawa hai gulshan mein gulon ki pasbani ka

pas-e-parda wahi phulon ke sauda-gar nikalte hain

hum is basti ko farzanon ki basti kah nahin sakte

yahan to ek zara si baat par KHanjar nikalte hain

zamane mein 'zafar' logon ka andaza hi mushkil hai

jinhen nazuk badan samjho wahi patthar nikalte hain