pahan ke pairahan-e-rang-o-bu nikalta hai

pahan ke pairahan-e-rang-o-bū nikaltā hai

kis ehtimām se vo ḳhūb-rū nikaltā hai

'ajab hai shahr kī maḳhlūq jis ko chhūtā huuñ

gale se tiir badan se lahū nikaltā hai

maiñ tujh ko vus’at-e-dil meñ kahāñ kahāñ dekhūñ

har ek parda-e-manzar se tū nikaltā hai

koī bhī naqsh banā.ūñ to us ke rangoñ se

vahī nikaltā hai aur hū-bahū nikaltā hai

maiñ jis ke nuur se rahtā huuñ raah meñ raushan

vo āftāb pas-e-justujū nikaltā hai

maiñ us ko shahr kī galiyoñ meñ DhūñDhtā huuñ magar

mirā ġhazāl sar-e-dasht-e-hū nikaltā hai

'ajīb shahr hai jis ghar pe dījiye dastak

khule agar to hamārā 'adū nikaltā hai

pahan ke pairahan-e-rang-o-bu nikalta hai

kis ehtimam se wo KHub-ru nikalta hai

'ajab hai shahr ki maKHluq jis ko chhuta hun

gale se tir badan se lahu nikalta hai

main tujh ko wus’at-e-dil mein kahan kahan dekhun

har ek parda-e-manzar se tu nikalta hai

koi bhi naqsh banaun to us ke rangon se

wahi nikalta hai aur hu-bahu nikalta hai

main jis ke nur se rahta hun rah mein raushan

wo aaftab pas-e-justuju nikalta hai

main us ko shahr ki galiyon mein DhunDhta hun magar

mera ghazal sar-e-dasht-e-hu nikalta hai

'ajib shahr hai jis ghar pe dijiye dastak

khule agar to hamara 'adu nikalta hai