paheli kaun bujhega jawab-e-naz-e-jaanan ki

pahelī kaun būjhegā javāb-e-nāz-e-jānāñ kī

ham us huuñ ko samajhte haiñ nahīñ kī us ne yā haañ kī

azal se ye amānat hai junūn-e-fitna-sāmāñ kī

ḳhirad ke haath lag saktī nahīñ dhajjī garebāñ kī

agar maujoñ se Dar ke ham bhī sāhil hī pe rah jaate

to duniyā par haqīqat hashr tak khultī na tūfāñ kī

giraftār-e-balā ke haq meñ vo zanjīr bantā hai

jo naala niiñd uḌā detā hai zindāñ ke nigahbāñ kī

kahe kuchh to bharam jaa.e jo chup baiThe to huuk uTThe

zarūrat maut ban jaatī hai ġhairat-dār insāñ kī

kuchh aise phuul ham ne bhī chune the apne dāman meñ

jo apne saath raunaq le ga.e gulzār-e-imkāñ kī

vo dīvāna mire nazdīk hoshyāroñ se achchhā hai

haqīqat jis ne kuchh samjhī nahīñ tār-e-rag-e-jāñ kī

ye majbūrī tamāshā chashm-e-ālam meñ banā varna

ḳhushī se dhajjiyāñ koī uḌātā hai garebāñ kī

chaman kyā hai namūna mere ik rañgīñ tasavvur kā

nashāt-e-kār ne sūrat badal dī hai bayābāñ kī

nikhāreñge yahī kuchh phuul aur kāñTe kī rañgat ko

phaTe dāman pe jo tārīḳh likkheñge gulistāñ kī

muqaddar meñ jo thī ai 'jurm' qaid-e-zīst kī saḳhtī

anāsir ke ravābit ban ga.e dīvār-o-zindāñ kī

paheli kaun bujhega jawab-e-naz-e-jaanan ki

hum us hun ko samajhte hain nahin ki us ne ya han ki

azal se ye amanat hai junun-e-fitna-saman ki

KHirad ke hath lag sakti nahin dhajji gareban ki

agar maujon se Dar ke hum bhi sahil hi pe rah jate

to duniya par haqiqat hashr tak khulti na tufan ki

giraftar-e-bala ke haq mein wo zanjir banta hai

jo nala nind uDa deta hai zindan ke nigahban ki

kahe kuchh to bharam jae jo chup baiThe to huk uTThe

zarurat maut ban jati hai ghairat-dar insan ki

kuchh aise phul hum ne bhi chune the apne daman mein

jo apne sath raunaq le gae gulzar-e-imkan ki

wo diwana mere nazdik hoshyaron se achchha hai

haqiqat jis ne kuchh samjhi nahin tar-e-rag-e-jaan ki

ye majburi tamasha chashm-e-alam mein bana warna

KHushi se dhajjiyan koi uData hai gareban ki

chaman kya hai namuna mere ek rangin tasawwur ka

nashat-e-kar ne surat badal di hai bayaban ki

nikhaarenge yahi kuchh phul aur kanTe ki rangat ko

phaTe daman pe jo tariKH likkhenge gulistan ki

muqaddar mein jo thi ai 'jurm' qaid-e-zist ki saKHti

anasir ke rawabit ban gae diwar-o-zindan ki