pahla sa aashiqi ka wo mear bhi nahin

pahlā sā āshiqī kā vo me.aar bhī nahīñ

aur husn kī vo garmī-e-bāzār bhī nahīñ

lillāh ab to ruḳh se uThā dījiye naqāb

aise meñ koī tālib-e-dīdār bhī nahīñ

sar-basta-rāz-hā-e-haqīqat kī dāstāñ

kahte haiñ vo jo vāqif-e-asrār bhī nahīñ

apnā ajiib haal hai zindān-e-dahr meñ

āzād bhī nahīñ haiñ giraftār bhī nahīñ

josh-e-junūn-e-ishq ko kyā nazr duuñ ki ab

dāmān-e-zindagī meñ koī taar bhī nahīñ

hai qāfila bhī bhaTkā huā apnī raah se

manzil-shanās qāfila-sālār bhī nahīñ

dekhā hai jab se jalva-e-rū-e-jamāl-e-dost

'mūsā' ko zindagī se koī pyaar bhī nahīñ

pahla sa aashiqi ka wo mear bhi nahin

aur husn ki wo garmi-e-bazar bhi nahin

lillah ab to ruKH se uTha dijiye naqab

aise mein koi talib-e-didar bhi nahin

sar-basta-raaz-ha-e-haqiqat ki dastan

kahte hain wo jo waqif-e-asrar bhi nahin

apna ajib haal hai zindan-e-dahr mein

aazad bhi nahin hain giraftar bhi nahin

josh-e-junun-e-ishq ko kya nazr dun ki ab

daman-e-zindagi mein koi tar bhi nahin

hai qafila bhi bhaTka hua apni rah se

manzil-shanas qafila-salar bhi nahin

dekha hai jab se jalwa-e-ru-e-jamal-e-dost

'musa' ko zindagi se koi pyar bhi nahin