pahle andaz-e-guftugu aae

pahle andāz-e-guftugū aa.e

phir koī un ke rū-ba-rū aa.e

terī yaad aa.ī is tarah ai dost

terī zulfoñ kī jaise bū aa.e

mujh ko be-sāḳhta hañsī aa.ī

hādse jab bhī rū-ba-rū aa.e

jal rahe haiñ charāġh palkoñ par

aise aalam meñ kaash tū aa.e

DhūñDne tujh ko tere kūche meñ

kitne hī ahl-e-justujū aa.e

pākī-e-zehn-o-dil hī sab kuchh hai

vaise kitne hī bā-vazū aa.e

be-ġharaz tere dar pe kaun aaya

sab asīrān-e-ārzū aa.e

mil ga.ī hai nigāh saaqī se

daur meñ sāġhar-o-subū aa.e

Duub kar terī yaad meñ 'aḳhtar'

har bulandī ko ham bhī chhū aa.e

pahle andaz-e-guftugu aae

phir koi un ke ru-ba-ru aae

teri yaad aai is tarah ai dost

teri zulfon ki jaise bu aae

mujh ko be-saKHta hansi aai

hadse jab bhi ru-ba-ru aae

jal rahe hain charagh palkon par

aise aalam mein kash tu aae

DhunDne tujh ko tere kuche mein

kitne hi ahl-e-justuju aae

paki-e-zehn-o-dil hi sab kuchh hai

waise kitne hi ba-wazu aae

be-gharaz tere dar pe kaun aaya

sab asiran-e-arzu aae

mil gai hai nigah saqi se

daur mein saghar-o-subu aae

Dub kar teri yaad mein 'aKHtar'

har bulandi ko hum bhi chhu aae