pahle chup-chap mujhe takta raha darwaza

pahle chup-chāp mujhe taktā rahā darvāza

jūñhī maiñ jaane lagā bol paḌā darvāza

aaj tak bhuul nahīñ paayā maiñ un tīnoñ ko

vo mohalla vo galī aur tirā darvāza

pahle ham donoñ baḌī der talak hañste rahe

baat furqat kī chalī rone lagā darvāza

ik yahī baat samajh meñ nahīñ aa.ī ab tak

kyoñ palaT aaya thā maiñ jab vo khulā darvāza

maiñ jahāñ dastakeñ detā rahā dīvār thī vo

aur jise samjhā thā dīvār vo thā darvāza

jaane kis shaḳhs ne dīvār pe dastak dī hai

ki achānak hī vahāñ phuuT paḌā darvāza

ye vo dastak hai ki darvāza jise jāntā hai

ḳhud-ba-ḳhud yūñhī nahīñ khulne lagā darvāza

bad-havāsī kā ye aalam thā ki kuchh yaad na thā

aur to aur mujhe bhuul gayā darvāza

ka.ī darvāze nikal aate the darvāze se

aise lagtā hai ki ab bāñjh huā darvāza

ek din bahs chhiḌī maut haqīqat kyā hai

kuchh ne dīvār kahā kuchh ne kahā darvāza

rā.egāñ umr kaTī khul na sakā rāz-e-hayāt

zindagī ḳhatm huī tab ye khulā darvāza

ḳhvāb-e-ġhaflat meñ rahā tauba kā aaya na ḳhayāl

aur jab aañkh khulī band huā darvāza

zabt itnā bhī mire bas meñ nahīñ thā 'ahmad'

habs jab had se baḌhā toḌ diyā darvāza

pahle chup-chap mujhe takta raha darwaza

junhi main jaane laga bol paDa darwaza

aaj tak bhul nahin paya main un tinon ko

wo mohalla wo gali aur tera darwaza

pahle hum donon baDi der talak hanste rahe

baat furqat ki chali rone laga darwaza

ek yahi baat samajh mein nahin aai ab tak

kyon palaT aaya tha main jab wo khula darwaza

main jahan dastaken deta raha diwar thi wo

aur jise samjha tha diwar wo tha darwaza

jaane kis shaKHs ne diwar pe dastak di hai

ki achanak hi wahan phuT paDa darwaza

ye wo dastak hai ki darwaza jise jaanta hai

KHud-ba-KHud yunhi nahin khulne laga darwaza

bad-hawasi ka ye aalam tha ki kuchh yaad na tha

aur to aur mujhe bhul gaya darwaza

kai darwaze nikal aate the darwaze se

aise lagta hai ki ab banjh hua darwaza

ek din bahs chhiDi maut haqiqat kya hai

kuchh ne diwar kaha kuchh ne kaha darwaza

raegan umr kaTi khul na saka raaz-e-hayat

zindagi KHatm hui tab ye khula darwaza

KHwab-e-ghaflat mein raha tauba ka aaya na KHayal

aur jab aankh khuli band hua darwaza

zabt itna bhi mere bas mein nahin tha 'ahmad'

habs jab had se baDha toD diya darwaza