pahle dariya se sahra ho jata hun

pahle dariyā se sahrā ho jaatā huuñ

rote rote phir dariyā ho jaatā huuñ

tanhā.ī meñ ik mahfil sī rahtī hai

mahfil meñ jā kar tanhā ho jaatā huuñ

us ke husn ke sāmne tum apnī jaano

maiñ to bilkul hī andhā ho jaatā huuñ

jism pe jaadū kar detī hai vo āġhosh

maiñ dhīre dhīre bachcha ho jaatā huuñ

ḳhuub junūñ kartā huuñ jab hotā huuñ dukhī

is pāgalpan meñ achchhā ho jaatā huuñ

aisī ravāñ hotī hai vasl meñ abjad-e-jism

ek alif chaltā huuñ yā ho jaatā huuñ

ḳhāk-e-ravāñ huuñ martā huuñ ik jānib se

dūsrī jānib se paidā ho jaatā huuñ

jaane kyā hotā hai shā'irī karte vaqt

bilkul ‘farhat-ehsāsā’ ho jaatā huuñ

pahle dariya se sahra ho jata hun

rote rote phir dariya ho jata hun

tanhai mein ek mahfil si rahti hai

mahfil mein ja kar tanha ho jata hun

us ke husn ke samne tum apni jaano

main to bilkul hi andha ho jata hun

jism pe jadu kar deti hai wo aaghosh

main dhire dhire bachcha ho jata hun

KHub junun karta hun jab hota hun dukhi

is pagalpan mein achchha ho jata hun

aisi rawan hoti hai wasl mein abjad-e-jism

ek alif chalta hun ya ho jata hun

KHak-e-rawan hun marta hun ek jaanib se

dusri jaanib se paida ho jata hun

jaane kya hota hai sha'iri karte waqt

bilkul ‘farhat-ehsasa’ ho jata hun