pahle ek parda hamare samne Dala gaya

pahle ik parda hamāre sāmne Daalā gayā

is tarah dilkash nazāra aañkh se Taalā gayā

mustaqil āñkhoñ meñ itnī raushnī Daalī ga.ī

jis kī phir bīnā.ī se bīnā.ī kā haala gayā

chāñdnī bhī tīrgī meñ tīrgī se jā milī

jugnuoñ ko paikar-e-zulmat meñ yuuñ Dhālā gayā

dil ke har goshe meñ pahle ashk-e-ḳhūñ bo.e ga.e

tab kahīñ jā kar diloñ meñ 'ishq ko paalā gayā

jism ke saare 'anāsir muntashir hone lage

jab mohabbat ko hisār-e-'aql se Taalā gayā

āḳhirash jab raaz saare faash hone vaale the

tab kahānī meñ nayā kirdār ik Daalā gayā

pahle ek parda hamare samne Dala gaya

is tarah dilkash nazara aankh se Tala gaya

mustaqil aankhon mein itni raushni Dali gai

jis ki phir binai se binai ka haala gaya

chandni bhi tirgi mein tirgi se ja mili

jugnuon ko paikar-e-zulmat mein yun Dhaala gaya

dil ke har goshe mein pahle ashk-e-KHun boe gae

tab kahin ja kar dilon mein 'ishq ko pala gaya

jism ke sare 'anasir muntashir hone lage

jab mohabbat ko hisar-e-'aql se Tala gaya

aaKHirash jab raaz sare fash hone wale the

tab kahani mein naya kirdar ek Dala gaya