pahle jo thi wo dil ki mere baat bhi nahin

pahle jo thī vo dil kī mire baat bhī nahīñ

kuchh sāzgār in dinoñ hālāt bhī nahīñ

kyā dil kā haal hogā ḳhudā jaane tā-sahar

pahlī sī ab vo tāroñ bharī raat bhī nahīñ

ham ne vafā kā un ko dikhāyā hai aa.ina

is meñ to barhamī kī koī baat bhī nahīñ

sab log ajnabī haiñ yahāñ kis ko deñ sadā

is shahr meñ kisī se mulāqāt bhī nahīñ

kis ko sunā.eñ kaun sune kyā pata chale

dilchasp zindagī kī hikāyāt bhī nahīñ

ham kyā kisī se baat kareñ mehr-o-māh kī

raushan to ḳhud hamāre ḳhayālāt bhī nahīñ

'ahmad' ba-qadr-e-zarf haiñ āsūda sab yahāñ

tishna to koī rind-e-ḳharābāt bhī nahīñ

pahle jo thi wo dil ki mere baat bhi nahin

kuchh sazgar in dinon haalat bhi nahin

kya dil ka haal hoga KHuda jaane ta-sahar

pahli si ab wo taron bhari raat bhi nahin

hum ne wafa ka un ko dikhaya hai aaina

is mein to barhami ki koi baat bhi nahin

sab log ajnabi hain yahan kis ko den sada

is shahr mein kisi se mulaqat bhi nahin

kis ko sunaen kaun sune kya pata chale

dilchasp zindagi ki hikayat bhi nahin

hum kya kisi se baat karen mehr-o-mah ki

raushan to KHud hamare KHayalat bhi nahin

'ahmad' ba-qadr-e-zarf hain aasuda sab yahan

tishna to koi rind-e-KHarabaat bhi nahin