pahle pahle sab kuchh mushkil lagta hai

pahle pahle sab kuchh mushkil lagtā hai

phir ik 'arse baa'd meñ ye dil lagtā hai

jin logoñ kī manzil sundar hotī hai

un logoñ ko rastā manzil lagtā hai

vo jo mahfil meñ bhī tanhā hotā hai

tanhā hotā hai to mahfil lagtā hai

jis din tum se achchhī bāteñ hotī haiñ

saarā ambar jhilmil jhilmil lagtā hai

jo kahtā hai 'aurat bas ghar dekhegī

laakh paḌhā likkhā ho jāhil lagtā hai

mājhī kā gar dil dariyā meñ lag jaa.e

phir us ko har qatra sāhil lagtā hai

achchhā paḌhne likhne vaalā vo shā'ir

chāhe muflis ho par qābil lagtā hai

vo kuchh apnoñ kī ḳhātir sab sahtā hai

chhoḌo tum ko to bas buzdil lagtā hai

pahle pahle sab kuchh mushkil lagta hai

phir ek 'arse ba'd mein ye dil lagta hai

jin logon ki manzil sundar hoti hai

un logon ko rasta manzil lagta hai

wo jo mahfil mein bhi tanha hota hai

tanha hota hai to mahfil lagta hai

jis din tum se achchhi baaten hoti hain

sara ambar jhilmil jhilmil lagta hai

jo kahta hai 'aurat bas ghar dekhegi

lakh paDha likkha ho jahil lagta hai

majhi ka gar dil dariya mein lag jae

phir us ko har qatra sahil lagta hai

achchha paDhne likhne wala wo sha'ir

chahe muflis ho par qabil lagta hai

wo kuchh apnon ki KHatir sab sahta hai

chhoDo tum ko to bas buzdil lagta hai