pahle sa rang-rup tumhaara nahin raha

pahle sā rang-rūp tumhārā nahīñ rahā

duniyā meñ aur kuchh bhī hamārā nahīñ rahā

aise nikal gayā hai hudūd-o-quyūd se

dariyā ke ār-pār kinārā nahīñ rahā

tujh se bichhaḌ ke dil kā vo nuqsān ho gayā

ab to koī ḳhasāra ḳhasāra nahīñ rahā

chāroñ taraf hai surḳh ishāroñ kā jamghaTā

raste meñ koī sabz ishāra nahīñ rahā

vo sab ke sab falak ne haiñ uupar uThā liye

zer-e-zamīn koī sitāra nahīñ rahā

aadhā gañvā ke aap kī chīḳh-o-pukār hai

lekin hamāre paas to saarā nahīñ rahā

kitnā paḌā hai farq mirī maañ kī maut se

ab maiñ kisī kī aañkh kā taarā nahīñ rahā

le jā rahe ho kaise mirā dil nikāl kar

kyā maiñ tumhārā saare kā saarā nahīñ rahā

miTTī meñ jā milā hai sikandar bhī jiit kar

aisā nahīñ ki haar ke daarā nahīñ rahā

yaḳh-basta pāniyoñ kī tarah jam ke rah gayā

jab se lahū meñ koī sharāra nahīñ rahā

kuchh aur sar-phiroñ ko bhī vahshat ne aa liyā

majnūñ kā dasht par vo ijāra nahīñ rahā

'mas.ūd' apne paaoñ par ham kyā khaḌe hue

baisākhiyoñ kā koī sahārā nahīñ rahā

pahle sa rang-rup tumhaara nahin raha

duniya mein aur kuchh bhi hamara nahin raha

aise nikal gaya hai hudud-o-quyud se

dariya ke aar-par kinara nahin raha

tujh se bichhaD ke dil ka wo nuqsan ho gaya

ab to koi KHasara KHasara nahin raha

chaaron taraf hai surKH ishaaron ka jamghaTa

raste mein koi sabz ishaara nahin raha

wo sab ke sab falak ne hain upar uTha liye

zer-e-zamin koi sitara nahin raha

aadha ganwa ke aap ki chiKH-o-pukar hai

lekin hamare pas to sara nahin raha

kitna paDa hai farq meri man ki maut se

ab main kisi ki aankh ka tara nahin raha

le ja rahe ho kaise mera dil nikal kar

kya main tumhaara sare ka sara nahin raha

miTTi mein ja mila hai sikandar bhi jit kar

aisa nahin ki haar ke dara nahin raha

yaKH-basta paniyon ki tarah jam ke rah gaya

jab se lahu mein koi sharara nahin raha

kuchh aur sar-phiron ko bhi wahshat ne aa liya

majnun ka dasht par wo ijara nahin raha

'masud' apne paon par hum kya khaDe hue

baisakhiyon ka koi sahaara nahin raha