pahle sadmat ke dariya mein utara KHud ko

pahle sadmāt ke dariyā meñ utārā ḳhud ko

aur phir baḌh ke diyā maiñ ne sahārā ḳhud ko

ban-sañvar kar vo chalā jaatā hai lekin ghanToñ

aa.ina dekhtā rahtā hai bechāra ḳhud ko

Dūbne vāloñ ko baḌh kar ye bachātā kyoñ nahīñ

itnā bebas kyoñ samajhtā hai kinārā ḳhud ko

vo mirī zaat kā hissa hai chhupā hai mujh meñ

maiñ ne ye soch ke har baar pukārā ḳhud ko

mujh se mil kar tirī sūrat nikhar aa.ī kitnī

ġhaur se dekhā nahīñ tū ne dobārā ḳhud ko

kitne asrār khule mehr-o-vafā ke mujh par

ātish-e-ishq se jab maiñ ne guzārā ḳhud ko

apne jalvoñ se kabhī us ne nikhārā hai mujhe

le ke añgḌā.ī kabhī us ne sañvārā ḳhud ko

aadī us ne jo banāyā hai mujhe apnā 'fahīm'

maiñ baġhair us ke nahīñ kartā gavārā ḳhud ko

pahle sadmat ke dariya mein utara KHud ko

aur phir baDh ke diya main ne sahaara KHud ko

ban-sanwar kar wo chala jata hai lekin ghanTon

aaina dekhta rahta hai bechaara KHud ko

Dubne walon ko baDh kar ye bachata kyon nahin

itna bebas kyon samajhta hai kinara KHud ko

wo meri zat ka hissa hai chhupa hai mujh mein

main ne ye soch ke har bar pukara KHud ko

mujh se mil kar teri surat nikhar aai kitni

ghaur se dekha nahin tu ne dobara KHud ko

kitne asrar khule mehr-o-wafa ke mujh par

aatish-e-ishq se jab main ne guzara KHud ko

apne jalwon se kabhi us ne nikhaara hai mujhe

le ke angDai kabhi us ne sanwara KHud ko

aadi us ne jo banaya hai mujhe apna 'fahim'

main baghair us ke nahin karta gawara KHud ko