pahle samundaron mein utara gaya mujhe

pahle samundaroñ meñ utārā gayā mujhe

phir pyaas kī hadoñ se guzārā gayā mujhe

dekhā to kuchh nahīñ thā vahāñ dasht ke sivā

phir bhī lagā ki jaise pukārā gayā mujhe

'umr-e-ravāñ ne pūchh liyā mujh se ek din

kyoñ be-dilī ke saath guzārā gayā mujhe

pahle vo merī maut pe ḳhud mutma.in huā

phir daar se zamīñ pe utārā gayā mujhe

baazī ko jītne kī havas meñ bisāt par

afsos jān-būjh ke haarā gayā mujhe

yuuñ hī maiñ us kī bazm se uTh kar nahīñ gayā

dar-asl pahle us kā ishāra gayā mujhe

kuchh maiñ bhī tez-gām nahīñ thā kuchh ai 'nafas'

pur-ḳhār rāstoñ se guzārā gayā mujhe

pahle samundaron mein utara gaya mujhe

phir pyas ki hadon se guzara gaya mujhe

dekha to kuchh nahin tha wahan dasht ke siwa

phir bhi laga ki jaise pukara gaya mujhe

'umr-e-rawan ne puchh liya mujh se ek din

kyon be-dili ke sath guzara gaya mujhe

pahle wo meri maut pe KHud mutmain hua

phir dar se zamin pe utara gaya mujhe

bazi ko jitne ki hawas mein bisat par

afsos jaan-bujh ke haara gaya mujhe

yun hi main us ki bazm se uTh kar nahin gaya

dar-asl pahle us ka ishaara gaya mujhe

kuchh main bhi tez-gam nahin tha kuchh ai 'nafas'

pur-KHar raston se guzara gaya mujhe