pahle to apne husn se ghayal kiya mujhe

pahle to apne husn se ghāyal kiyā mujhe

marham lagā ke baa'd meñ pāgal kiyā mujhe

chādar thā maiñ ghisī huī mujh meñ tapish na thī

kal raat us ne oḌh ke kambal kiyā mujhe

kah bhī rahā thā ḳhaak huuñ mujh ko namī na de

kūza-garī kī aaḌ meñ daldal kiyā mujhe

pahle to merī ruuh ko dil meñ chhupā liyā

phir ḳhud kivāḌ ban ga.ī sāñkal kiyā mujhe

ho kar bhī har jagah kahīñ dikhtā nahīñ huuñ maiñ

tanhā.iyoñ kī gard ne ojhal kiyā mujhe

mujh ko kisī kī yaad ne sarsabz kar diyā

us ke tavīl hijr ne jangal kiyā mujhe

aisā savāl thā maiñ ki jis kā na thā javāb

mushkil bahut thā us ne magar hal kiyā mujhe

pahle to apne husn se ghayal kiya mujhe

marham laga ke ba'd mein pagal kiya mujhe

chadar tha main ghisi hui mujh mein tapish na thi

kal raat us ne oDh ke kambal kiya mujhe

kah bhi raha tha KHak hun mujh ko nami na de

kuza-gari ki aaD mein daldal kiya mujhe

pahle to meri ruh ko dil mein chhupa liya

phir KHud kiwaD ban gai sankal kiya mujhe

ho kar bhi har jagah kahin dikhta nahin hun main

tanhaiyon ki gard ne ojhal kiya mujhe

mujh ko kisi ki yaad ne sarsabz kar diya

us ke tawil hijr ne jangal kiya mujhe

aisa sawal tha main ki jis ka na tha jawab

mushkil bahut tha us ne magar hal kiya mujhe