pahle to dam-e-zulf mein uljha liya mujhe

pahle to dām-e-zulf meñ uljhā liyā mujhe

bhūle se phir kabhī na dilāsā diyā mujhe

kyā dardnāk manzar-e-kashtī thā ruud meñ

maiñ nā-ḳhudā ko dekh rahā thā ḳhudā mujhe

baiThā huā hai rashk-e-masīhā mire qarīb

kas bebasī se dekh rahī hai qazā mujhe

un kā bayān merī zabāñ par jo aa gayā

lahje ne un ke kar diyā kyā ḳhush-navā mujhe

jin ko rahī sadā mire marne kī aarzū

jiine kī de rahe haiñ vahī ab du'ā mujhe

jaane kā vaqt aayā to aa.ī sadā-e-haq

muddat se aarzū thī mile ham-navā mujhe

har bām-o-dar se ek ishāra hai roz-o-shab

ne maiñ vafā ko chhoḌ sakā ne vafā mujhe

duniyā ne kitne mujh ko dikhā.e haiñ sabz baaġh

un se na koī kar sakā lekin judā mujhe

ḳhushbū se kis kī mahak rahe haiñ mashām-e-jāñ

dāman se de rahā hai koī to havā mujhe

tasvīr us ke haath meñ lab par mirī ġhazal

dekhā na ek aañkh na jis ne sunā mujhe

fard-e-amal meñ merī hoñ shāmil sab un ke jaur

un ke kiye kī shauq se diije sazā mujhe

merī vafā kā un ko mile hashr meñ sila

mil jaa.eñ un ke naam ke jaur-o-jafā mujhe

har roz mujh ko apnā badalnā paḌā javāb

roz ik sabaq paḌhātā hai qāsid nayā mujhe

dekhā tumhārī shakl meñ husn-e-azal kī zau

sajda tumhāre dar pe huā hai ravā mujhe

jhoñkā koī nasīm kā 'gulzār'-e-nāz meñ

un kā payām kaash sunā.e sabā mujhe

pahle to dam-e-zulf mein uljha liya mujhe

bhule se phir kabhi na dilasa diya mujhe

kya dardnak manzar-e-kashti tha rud mein

main na-KHuda ko dekh raha tha KHuda mujhe

baiTha hua hai rashk-e-masiha mere qarib

kas bebasi se dekh rahi hai qaza mujhe

un ka bayan meri zaban par jo aa gaya

lahje ne un ke kar diya kya KHush-nawa mujhe

jin ko rahi sada mere marne ki aarzu

jine ki de rahe hain wahi ab du'a mujhe

jaane ka waqt aaya to aai sada-e-haq

muddat se aarzu thi mile ham-nawa mujhe

har baam-o-dar se ek ishaara hai roz-o-shab

ne main wafa ko chhoD saka ne wafa mujhe

duniya ne kitne mujh ko dikhae hain sabz bagh

un se na koi kar saka lekin juda mujhe

KHushbu se kis ki mahak rahe hain masham-e-jaan

daman se de raha hai koi to hawa mujhe

taswir us ke hath mein lab par meri ghazal

dekha na ek aankh na jis ne suna mujhe

fard-e-amal mein meri hon shamil sab un ke jaur

un ke kiye ki shauq se dije saza mujhe

meri wafa ka un ko mile hashr mein sila

mil jaen un ke nam ke jaur-o-jafa mujhe

har roz mujh ko apna badalna paDa jawab

roz ek sabaq paDhata hai qasid naya mujhe

dekha tumhaari shakl mein husn-e-azal ki zau

sajda tumhaare dar pe hua hai rawa mujhe

jhonka koi nasim ka 'gulzar'-e-naz mein

un ka payam kash sunae saba mujhe