pahle to faqat us ka talabgar hua main

pahle to faqat us kā talabgār huā maiñ

phir ishq meñ ḳhud apne giraftār huā maiñ

āñkhoñ meñ basā jab bhī koī ajnabī chehra

ik lazzat-e-be-nām se do-chār huā maiñ

maiñ yūsuf-e-sānī na 'zuleḳhā' na vo darbār

kyā soch ke rusvā sar-e-bāzār huā maiñ

ik umr bagūloñ ke ta.āqub meñ guzārī

phir apnī hī parchhā.īñ se bezār huā maiñ

maiñ munsif-e-daurāñ na faqīhoñ meñ huuñ shāmil

kis jurm meñ be-jubba-o-dastār huā maiñ

haq-goī kī pādāsh meñ mansūr kī sūrat

har daur meñ vaqf-e-rasan-o-dār huā maiñ

maiñ apne hī hone se gurezāñ huā 'ḳhusrav'

iqrār kī sūrat kabhī inkār huā maiñ

pahle to faqat us ka talabgar hua main

phir ishq mein KHud apne giraftar hua main

aankhon mein basa jab bhi koi ajnabi chehra

ek lazzat-e-be-nam se do-chaar hua main

main yusuf-e-sani na 'zuleKHa' na wo darbar

kya soch ke ruswa sar-e-bazar hua main

ek umr bagulon ke taaqub mein guzari

phir apni hi parchhain se bezar hua main

main munsif-e-dauran na faqihon mein hun shamil

kis jurm mein be-jubba-o-dastar hua main

haq-goi ki padash mein mansur ki surat

har daur mein waqf-e-rasan-o-dar hua main

main apne hi hone se gurezan hua 'KHusraw'

iqrar ki surat kabhi inkar hua main